Արցախի Կովսականում այսօր տեղի է ունեցել Ադրբեջանում հավատարմագրված դիվանագիտական կորպուսի անդամների համար նախատեսված ճեպազրույց։ Դրան մասնակցել են Ադրբեջանի նախագահի օգնական Հիքմեթ Հաջիևը, ինչպես նաև թվային զարգացման և տրանսպորտի փոխնախարար Ռահման Գումմետովը։
Ադրբեջանցի պաշտոնյաները շարունակել են առաջ մղել, այսպես կոչված, «Զանգեզուրի միջանցքի» թեզը։ «Զանգեզուրի միջանցքի կարևորությունը չի սահմանափակվում միայն բեռնափոխադրումներով։ Միջանցքը նաև կծառայի որպես էներգետիկ և կապի ենթակառուցվածքների հարթակ։
Ինչպես այսօր տեսնում եք՝ Ադրբեջանն արդեն կարևոր քայլեր է ձեռնարկում այս միջանցքի իրականացման համար։ Ղարաբաղում և Արևելյան Զանգեզուրի շրջաններում իրականացվող լայնածավալ վերականգնման ծրագիրը նպատակ ունի այս տարածքները վերածել երկրի զարգացման նոր կենտրոնների»,- ասել է Գումմետովը։ Նա նշել է, որ այս նախագծի շրջանակում կառուցվում է 3200 կիլոմետր ճանապարհ, որի 71%-ն արդեն ավարտված է, 180 կիլոմետր նոր երկաթուղային գծերի կառուցման 75%-ն արդեն ավարտված է։
Ադրբեջանցի պաշտոնյան ասել է, որ տարածաշրջանում կառուցվել են նաև երեք նոր միջազգային օդանավակայաններ։ Հորադիզ-Աղբենդ մայրուղու և երկաթուղու շինարարությունն էլ նախատեսվում է ավարտել հաջորդ տարի։ «Այս նախագծերի արդյունքում Արաքսի միջանցքը կզարգանա Զանգեզուրի միջանցքին զուգահեռ՝ ավելի խթանելով տարածաշրջանում տրանսպորտային կապերի ընդլայնումը և ինտեգրումը։
Հարկ է նշել, որ արդեն իսկ գործնական քայլեր են ձեռնարկվում Հայաստանի տարածքով տարանցման նախկինում գոյություն ունեցող սահմանափակումները վերացնելու համար»,- հայտարարել է նա։ Պաշտոնյան հավելել է, թե «Զանգեզուրի միջանցքի» բացումը կստեղծի բոլորովին նոր աշխարհատնտեսական իրականություն տարածաշրջանի տրանսպորտային ցանցի համար։ Ուշագրավ է, որ միջոցառումից հրապարակված լուսանկարներում ադրբեջանական կողմը ցուցադրել է «Զանգեզուրի միջանցք» գրությամբ ֆայլեր։
Ադրբեջանական աղբյուրները նաև հրապարակումներ են արել, որ Ադրբեջանում հավատարմագրված դիվանագիտական կորպուսի ներկայացուցիչների համար անցկացված ճեպազրույցը եղել է «Զանգեզուրի միջանցք՝ տարածաշրջանային տրանսպորտային ցանց» թեմայով։
Փաստացի, Բաքուն շարունակում է խեղաթյուրել իրականությունն ու համաձայնությունների բովանդակությունը։ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին։ Ի դեպ, նման միջանցքի մասին խոսք չկա նաև 2020 թվականի նոյեմբերի 9-ին Հայաստանի, ՌԴ-ի ու Ադրբեջանի ղեկավարների եռակողմ հայտարարությունում։