Փարաքարի համայնքապետ Վալոդյա Գրիգորյանի ու նրա ընկեր՝ քրեական ոստիկան Կարեն Աբրահամյան սպանությունը փետրվարին տեղի ունեցած սպանության շարունակությունն է։ Այս մասին ՀՀ 2026 թ. պետական բյուջեի մասին օրենքի նախագծի նախնական քննարկմանն ասաց ներքին գործերի նախարար Արփինե Սարգսյանը։
«Սա հստակ ֆիքսված է»,- ընդգծեց նա։
Նախարարը նաև նշեց. «Ինչքան էլ հանրային տիրույթում անընդհատ ասեն, որ Փարաքարի համայնքում տեղի ունեցած իրադարձությունը քաղաքական մոտիվ ունի, քաղաքական իշխանությունն է կազմակերպել, սրանք բոլորը խոսակցություններ են։
Այս խոսակցությունները դառնում են ոչ փաստահեն այն պայմաններում, երբ մենք քրեական վարույթով ունենք անցնող հստակ ապացույցներ, որով հիմնավորվում է կատարված հանցագործության մոտիվը։ Դա, այո՛, եղել է փետրվարյան հանցագործության շարունակությունը»։
ՆԳ նախարարն ասաց, որ սպանության հիմնական կատարողը բացահայտվել է, անձը տվել է ինքնախոստովանական ցուցմունք։
Հիշեցնենք՝ սեպտեմբերի 23-ին՝ ժամը 23։52-ին, ՆԳՆ ոստիկանություն ահազանգ էր ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ Սպանվել էին Փարաքարի համայնքապետ Վալոդյա Գրիգորյանն ու քրեական ոստիկան Կարեն Աբրահամյանն էր, վիրավորում էր ստացել նրանց հետ գտնվող երրորդ անձը՝ Արծրուն Գալստյանը:
Փարաքարի համայնքապետի և նրա ընկերոջ սպանության գործով կալանավորված են Մերձավանի բնակիչներ Նարեկ Օհանյանն ու Գևորգ Հարությունյանը:
ՆԳ նախարարն ի պատասխան «Հայաստան» խմբակցության պատգամավոր Աննա Գրիգորյանի հարցին hոկտեմբերի 20-ին Գյումրիի քաղաքապետարանի մոտ կարմիր բերետավորների կողմից քաղաքացիներին ծեծելու մասին, ասաց. «Ներքին անվտանգության ու հակակոռուպցիոն վարչության ծառայողներն իմ հանձնարարականով ուսումնասիրել են ամբողջ պրոցեսը, ծեծի դրվագ չի հայտնաբերվել, չի եղել կոնկրետ իրավիճակ, որը եղել է ոչ իրավաչափ»։
Նա նաև ասաց, որ ոստիկանը ֆիզիկական ուժ գործադրելու իրավաչափ հնարավորություն ունի, և կարող է այդ ընթացքում լինեն թերություններ, խախտումներ։