Հայաստանի և Թուրքիայի միջև առկա երկխոսությունն ու հարաբերությունները ինչ-որ առումով հայելային հակապատկերն են Ադրբեջանի հետ եղած իրավիճակի։ «Օրբելի» կենտրոնի կազմակերպած խորհրդաժողովի ժամանակ այս հայտարարությունն արեց ՀՀ արտգործնախարար Արարատ Միրզոյանը՝ պատասխանելով իրեն ուղղված հարցին, թե խաղաղության գործընթացը կառուցվում է երկու պետությունների, բայց ոչ ժողովուրդների միջև։
Միրզոյանը նշեց՝ երբ խոսում ենք Հայաստանի և Ադրբեջանի միջև հաստատված խաղաղության մասին, պետք է հասկանանք՝ հիմնական սկզբունքները համաձայնեցված են, բայց մնում են հարցեր, որոնք ենթակա են կարգավորման, այդ թվում՝ հասարակությունների, քաղաքացիների միջև կապերը։
«Այդ հաշտեցման կարիքը կա, բայց այս պահին հասարակությունների՝ մտավոր ամբողջական հաշտեցման բացակայությունը նաև օբյեկտիվ է, պայմանավորված է հոգեբանական խոր տրավմայով, վերքերով, որոնք դեռ շատ թարմ են, և հաղթահարելու խնդիր կա, ժամանակ է պահանջում»,- ասաց Միրզոյանը՝ նշելով, որ փորձում են կապեր հաստատել քաղհասարակությունների միջև։
Նրա խոսքով՝ եթե Ադրբեջանի դեպքում երկու երկրների կառավարությունների միջև կա հաստատված խաղաղություն, համաձայնեցված սկզբունքներ, գործընթաց, որը պիտի շարունակվի առանձին հարցերի շուրջ, և պետք է ջանք գործադրվի նաև հասարակությունների միջև հաշտեցման ուղղությամբ, Թուրքիայի պարագայում ճիշտ հակառակն է։
«Տարիներով, տասնամյակներով փակ սահմանների պայմաններում մարդիկ գնացել են, այցելել են իրար, առևտուր է եղել և կա՝ շատ շոշափելի, պրոբլեմն այն է եղել, որ այդ առևտուրը երրորդ երկրով է եղել, թռիչքներ են եղել և հիմա էլ կան, պայմանավորվածություն կա ավելացնել թռիչքները Թուրքիայից դեպի Երևան ու նաև դեպի Գյումրի։ Այդ խնդիրը մենք Թուրքիայի հետ երբեք չենք ունեցել, Թուրքիայի հետ խնդիրը եղել է այն, որ սահմանը եղել է փակ, և չեն եղել դիվանագիտական հարաբերություններ»,- նշեց Միրզոյանը։
Նա հավելեց՝ այսօր Թուրքիայի հետ շատ ինտենսիվ և բովանդակալի քաղաքական երկխոսություն է հաստատված։