Վերջին 7 տարիների ՀՀ-ի և Ադրբեջանի բանակցությունների շուրջ խոսակցությունները շատ թափանցիկ ու հրապարակային են եղել, լրագրողների հետ զրույցում ասաց ՔՊ-ական պատգամավոր Սարգիս Խանդանյանը։
Նա նշեց, որ նախկինում էլ են եղել բանակցություններ, որոնք առանձնապես արդյունք չեն տվել։
«Ես չէի ցանկանա մեկնաբանել Ադրբեջանի ԱԳ նախարարի ասածները՝ հաշվի առնելով, որ բանակցությունները բոլորին հայտնի են, 2018 թվականին էլ ՀՀ-ն ասել էր, որ բանակցություններին պետք է մասնակցի նաև ԼՂ-ն»,-ասաց նա։
Անդրադառնալով Բայրամովի հայտարարություներին, թե ՀՀ-ի սադրիչ գործողություններն են եղել պատճառը, որ Ադրբեջանը լայնամասշտաբ գործողություններ է սկսել՝ Խանդանյանն արձագանքեց.«Համաձայն չեմ, քանի որ Հայաստանը ելքեր էր փնտրում հակամարտությունը խաղաղ կարգավորելու համար, բայց նաև ակնհայտ էր, որ Ադրբեջանը պատրաստվում էր պատերազմի և, բնական է, որ պատերազմի պատրաստվող երկիրը հիմա պետք է տարբեր փաստարկներով արդարացնի իր ռազմական ագրեսիան»։
