Ես անգամ օդանավ եմ տրամադրել, ասել եմ՝ ուր ուզում եք, գնացեք, Ազգային ժողովում ճեպազրույցի ժամանակ ասել է վարչապետ Նիկոլ Փաշինյանը՝ անդրադառնալով3-րդ նախագահ Սերժ Սարգսյանի այն հայտարարությանը, որ նախկին նախագահները դիմել են իրեն՝ ասելով, որ ՌԴ իշխանություններին տեղյակ պահի, որ ուզում են իրենց հետ հանդիպում ունենալ 2020թ. պատերազմի ժամանակ:
Նշենք, որ Իմնեմնիմի հաղորդման ընթացքում Սերժ Սարգսյանը հայտարարել է, որ Փաշինյանին են փոխանցել, որ Ռուսաստանի իշխանություններին տեղյակ պահի, որ ՀՀ նախկին նախագահները ցանկություն ունեն հանդիպում ունենալ: Ըստ Սերժ Սարգսյանի՝ Փաշինյանն ասել էր. «Իրենք ուր ուզում են՝ թող գնան»:
***
Ես կարող եմ մի բան ասել վստահաբար, որ բանակցությունների սենյակում ես չեմ ասել որևէ բան, որը կհակասեր հրապարակավ արտահայտած դիրքորոշումներին։ Այս մասին նոյեմբերի 12-ին լրագրողների հետ զրույցում հայտարարել է Հայաստանի վարչապետ Նիկոլ Փաշինյանը՝ պատասխանելով Ադրբեջանի արտգործնախարար Բայրամովի այն հայտարարություններին, որ Հայաստանի վարչապետը հանկարծակի փոխել է իր դիրքորոշումը Լեռնային Ղարաբաղի բանակցությունների ընթացքում։
Նրա խոսքով՝ երբ խոսքը վերաբերում է միջպետական հարցերին, բանավոր խոսքին հղում անելը առանձնապես լավ ժանր չէ։ Փաշինյանը վստահեցրել է, որ իր բոլոր դիրքորոշումները 2018 թվականից ի վեր հրապարակայնորեն են հնչել։ «Դուք իմ դիրքորոշումներն էլ գիտեք, դիրքորոշումների փոփոխություններն էլ գիտեք, կասկածներն էլ գիտեք, տրանսֆորմացիաներն էլ գիտեք, ելույթներն էլ գիտեք», – ընդգծել է նա։