Եթե գնահատենք, թե սահմանազատման արդյունքում ինչ ճանապարհներ պետք է հանձնվեն, ապա դրանցից մեկը Տիգրանաշենն է։ Պահեստազորի գնդապետ, ռազմական փորձագետ Հայկ Նահապետյանը «ՓաստԻնֆո»-ի եթերում նշել է, որ եթե Ադրբեջանը վերադառնա Տիգրանաշեն, այն գտնվում է միջպետական ճանապարհի անմիջական հարևանությամբ, և Ադրբեջանի համար կարող է հիմնավոր լինել իր զինուժի տեղակայումը գյուղի հարակից տարածքներում՝ քաղաքացիների անվտանգության ապահովման նպատակով։
Բանախոսի դիտարկմամբ՝ եթե Տիգրանաշենը հանձնվի, Հայաստանը գործնականում կբաժանվի երկու մասի, և հայկական կողմը ստիպված կլինի կառուցել շրջանցող ճանապարհ, ինչը տեխնիկապես դժվարին և խնդրահարույց է։ Մյուս հարցն վերաբերում է Տավուշի բնակավայրերին․ դրանք հանձնելու դեպքում Վրաստան տանող երկու ճանապարհներից մեկի վրա Ադրբեջանը կսկսի ուղղակի վերահսկողություն իրականացնել, իսկ առավել վտանգավորը՝ Ռուսաստանից Հայաստան մտնող գազամուղն է հայտնվելու նրանց հսկողության տակ։ Հայաստանի հարավի կոմունիկացիաները վերահսկվում են ոչ միայն Ադրբեջանի, այլ նաև միջազգային կառույցների կողմից։
Փորձագետը նշում է, որ Հայաստանը փաստացի զրկվում է Ռուսաստանից էներգոհամակարգային ապահովում ստանալու հնարավորությունից, ինչը արդեն ազդում է հացահատիկի ներմուծման գործընթացի վրա։ Թուրքիան պատրաստ է Հայաստանին տրամադրել հացահատիկի և էներգակիրների մատակարարումներ, սակայն դրանք կլինեն ադրբեջանական աղբյուրից։ Սա նշանակում է, որ Հայաստանը «նստելու է ադրբեջանական գազի և նավթի ասեղի վրա», և հավելյալ սպառնալիք է ատոմակայանի փակման հնարավորությունը։
«Մեր տարածաշրջանը դառնալու է Ռուսաստանի համար ամենախոցելիներից մեկը։ ՆԱՏՕ-ի հետ Ադրբեջանը բաց համագործակցություն է իրականացնում։ Հարավային Կովկասում երեք հանրապետությունները արդեն բացահայտորեն ստանդարտացվում են ՆԱՏՕ-ի բանակի չափանիշներին, ինչը նշանակում է, որ տարածաշրջանը պատրաստվում է հարվածային ուժի կենտրոնացման՝ ուղղված երկու թիրախների վրա՝ Ռուսաստանին և Իրանին», – եզրափակել է Հայկ Նահապետյանը։