ԱՄՆ նախագահ Դոնալդ Թրամփն աջակցել է Ռուսաստանի հետ համագործակցող բոլոր երկրների նկատմամբ պատժամիջոցներ կիրառելու օրինագծին, հաղորդում է Business Standard-ը:
Փաստաթուղթն այժմ քննարկվում է Կոնգրեսում:
«Ինչպես գիտեք, ես սա առաջարկել եմ, որպեսզի Ռուսաստանի հետ գործարք կնքող ցանկացած երկիր ենթարկվի շատ խիստ պատժամիջոցների», – ասել է Թրամփը լրագրողներին։
ԱՄՆ նախագահը հավելել է, որ Իրանի տնտեսական գործընկերները կարող են ենթարկվել նմանատիպ պատժամիջոցների: Նա պարզաբանել է, որ Կոնգրեսը կարող է օրինագծի քննարկման ընթացքում արգելք ավելացնել Թեհրանի հետ համագործակցության վրա:
Երկկուսակցական օրինագիծը, որը հեղինակել են հանրապետական Լինդսի Գրեհեմը և դեմոկրատ Ռիչարդ Բլումենտալը, ներկայացվել է 2025 թվականի գարնանը։ Այն նախատեսում է 500% մաքսատուրք սահմանել ռուսական նավթ, նավթամթերք, բնական գազ կամ ուրան գնող երկրներից ներմուծվող ապրանքների վրա։ Այն նաև նախատեսում է պատժամիջոցներ կիրառել Ռուսաստանից ուրան գնող ցանկացած երկրի նկատմամբ։ Օրինագիծը պաշտպանել են 100 սենատորներից ավելի քան 80-ը։