«1994-ին հաղթանակ արձանագրելով՝ մենք հանգստացանք, իսկ Ադրբեջանը մոտ երեք տասնամյակ պատրաստվում էր պատերազմի հաջորդ փուլին»,- «Հայաստան-Արցախ» ՀԵՄ անդամների հետ «Առաջարկ Հայաստանին» նախաձեռնության շրջանակներում քննարկման ժամանակ ասել է արտաքին գործերի նախկին նախարար Արա Այվազյանը:
«Մեզ թվում էր՝ աշխարհը շուռ գա, մենք մեր հարցերը լուծել ենք, ոչ մի բան չի փոխվի: Իսկ աշխարհը փոխվում էր սրընթաց կերպով և, ի վերջո, այդ փոփոխությունները պիտի գային, մեզ հասնեին: 2020 թվականից արդեն հինգ տարի է անցել, բայց մեր հանրային դիսկուրսում և՛ իշխանությունը, և՛ ընդդիմությունը դեռ իրենց հայացքը նետում են անցյալ, բայց բոլորս խուսափում ենք ամենակարևոր հարցից՝ ինչ անել, որ երկիրը ոչ միայն գոյատևի, այլև զարգանա»,- երիտասարդներին ասել է Այվազյանը։
Ըստ նրա՝ նոր աշխարհակարգ ենք մուտք գործում, որտեղ հին կանոններն այլևս չեն գործում. «Այսօր գերիշխողը դարձել է ուժը, որը եկել է փոխարինելու իրավունքին, և շահը, որը եկել է փոխարինելու գաղափարախոսությանը»:
Նախկին արտգործնախարարի խոսքով՝ հանրության մեջ տարածված մտայնություն կա, թե ով էլ գա, նույն քաղաքականությունն է ստիպված վարելու, որովհետև անելանելի վիճակում ենք, այլընտրանք չկա. «Այլընտրանք կա, ժամանակն է, որ ՀՀ-ն անցնի խորքային, ռազմավարական հաշվարկներով դիվանագիտությանը»:
Անդրադառնալով Արցախի կորստին՝ Այվազյանն ասել է՝ այդ հարցում դիվանագիտության սխալը մեծ է եղել:
«Ընդհանրապես ընդունված է ասել, որ բանակը պետության մկաններն է, դիվանագիտությունը՝ ուղեղը: Ցավոք սրտի, ոչ մկաններն էին լուրջ, ոչ էլ մեր ուղեղն էր լավ աշխատում»: