«Դե ի՞նչ, ԱՄՆ նախագահ Դոնալդ Թրամփը 28 կետից բաղկացած ծրագիր է կազմել Ուկրաինայի և Ռուսաստանի միջև հրադադար և խաղաղության գործընթաց սկսելու համար։ Զելենսկին, որ ուղղակի խայտառակության էպիկենտրոնում է հայտնվել կոռուպցիոն սկանդալի պատճառով, նախնական համաձայնություն է տվել բանակցելու»,-արձագանքելով աշպարհում տեղի ունեցած զարգացումներին՝ գրում է քաղաքագետ Արա Պողոսյանը։
Նրա կարծիքով, հենց այդ պահին կոռուպցիոն սկանդալ երևան բերելը ձեռնտու էր Թրամփին, որովհետև Զելենսկու ինքնավստահությունը արդեն մոտենում է 0-ի։
«Այլ հարց է, որ այսպիսի խաղաղությունը շատ ավելի վատն էր, քան նախկինում առաջարկվողները։ Խոսվում է, որ պայմաններից մեկը այն է, որ Ուկրաինան զիջում է Դոնբասը, այդ թվում այն տարածքները, որոնք դեռևս գտնվում են Ուկրաինայի հսկողության տակ։
Զելենսկու համար սա առնվազն քաղաքական ինքնասպանություն է, բայց այլընտրանքն էլ մեծ չէ` առավելագույնը, ռազմական գործողությունները ձգել մինչև 2026 թվականի կեսեր, որից հետո Ուկրաինան ամբողջովին հյուծված կլինի, նոր մոբիլիզացիան քիչ բան կփոխի, բանակի վերակազմակերպումը երկար ժամանակ կպահանջի, իսկ տեխնոլոգիական ճեղքում ապահովել իրատեսական չէ։
Ռուսաստանը թեպետ իր պլան մինիմումը ապահովում է, սակայն դեռ երկար ժամանակ չի կարողանա շահել ուկրաինացիների համակրանքը, ինչը շատ ավելի մեծ կորուստ է, քան տարածքային կորուստները»,-գրում է նա։
Հիշեցնենք, որ պատերազմը դադարեցնելու խաղաղության ծրագրի նախագիծը ստանալուց հետո Ուկրաինայի նախագահ Վլադիմիր Զելենսկին հայտարարել է, որ պատրաստ է ԱՄՆ-ի հետ «ազնիվ աշխատանքի»։ Մի շարք ամերիկյան լրատվամիջոցներ հաղորդում են, որ ծրագրի համաձայն՝ Կիևը կհրաժարվի Ուկրաինայի արևելքում գտնվող Դոնբասի այն տարածքներից, որոնք դեռևս վերահսկում է, կկրճատի իր բանակի թվաքանակը և կպարտավորվի չմիանալ ՆԱՏՕ-ին։
«Անհասկանալի էր, թեծրագրի մշակման գործում որքանով է ներգրավված եղել Ուկրաինան։ Սպիտակ տան մամուլի քարտուղար Քերոլայն Լիվիտը հայտարարել է, որ ԱՄՆ-ն «հավասարապես ներգրավված է եղել երկու կողմերի հետ։ Առանձին հայտարարության մեջ Զելենսկու գրասենյակը հայտնել է, որ Ուկրաինան «համաձայնել է աշխատել ծրագրի դրույթների վրա այնպես, որ հանգեցնի պատերազմի արդարացի ավարտին»,-գրում է BBC-ն։