Այն մարդիկ, ովքեր գնացին Ադրբեջան և հիմա ակտիվ տարածում են ադրբեջանական ուղերձները, այդ մարդիկ ինձ համար Նիկոլ Փաշինյանի գործակալներն են: Այս մասին հրավիրված մամուլի ասուլիսի ժամանակ հայտարարել է «Միասնության թևեր» քաղաքական նախաձեռնության ղեկավար Արման Թաթոյանը՝ պատասխանելով հարցին, թե ինչ դիրքորոշում ու գնահատական կտա՝ Հայաստանի և Ադրբեջանի քաղհասարակությունների հանդիպման մասին:
«Նրանք հիմա Փաշինյանի այդ քաղաքականությունն իրագործելով, և անձամբ Փաշինյանը, պատասխանատու լինելով դրա համար ավելի է բացում Ադրբեջանի ձեռքերը, որպեսզի մեզ համար ավելի վտանգավոր քայլեր ձեռնարկեն»,- նշել է Թաթոյանը:
Անդրադառնալով խաղաղության օրակարգին՝ Թաթոյանն ընդգծել է՝ Փաշինյանն ամբողջությամբ ձախողել է այդ օրակարգը:
Նրա դիտարկմամբ՝ չի կարող մի երկրի ղեկավար, որը երեք պատերազմ, երեք պարտություն է բերել, նոր ցեղսապանություն է բերել խաղաղության օրակարգից խոսել:
***
«Նիկոլ Փաշինյանը վամպիրի պես սնվում է նախկին նախագահների ղեկավարման ժամանակահատվածի հարցերից։ Վամպիրի պես սնվում է, ուժեղանում-ուժեղանում է, սկսում է ռեպրեսիաներ, խախտումներ անել։ Իմ կարծիքով, քանի դեռ համակարգում, որը նստած է երկու թևերի վրա, նախկին նախագահները մասնակցում են ընտրապայքարին, ընդդիմության միավորման հեռանկար չի լինելու»,-լրագրողների հետ ընթացող ասուլիսում հայտարարեց նախկին ՄԻՊ, «Միասնության թևեր» քաղաքական ուժի հիմնադիր Արման Թաթոյանը։
Նրա գնահատմամբ, Փաշինյանին ձեռնտու է, որ նախկին նախագահները մասնակցեն ընտրապայքարին, Փաշինյանը նրանց համար իրեն փորձում է դարձնել ընդդիմություն։
«Նա նախկին նախագահներին կարող է ասել, հա, այսինչը չեք արել։ Ես Փաշինյանին հրավիրեցի բանավեճի, հիմա էլ պնդում եմ, թող գա, մի հատ տեսնենք՝ ինչպես է այդ հարցերին պատասխանելու, թող նախկինից խոսա, ներկայից խոսա, բայց ես նախընտրելու եմ իհարկե երկրի ապագայից խոսել»,-ասաց Թաթոյանը։
Նրա խոսքով, եթե նախկին նախագահները որոշեն մասնակցել ընտրապայքարին, իր մոտ հարց է առաջանալու, իսկապե՞ս նրանք ուզում են ազատվել Նիկոլ Փաշինյանից, թե՞ այլ նպատակմներ ու հարցեր կան։
«Դրա համար կարծում եմ, դա ճիշտ տարբերակն է»,-ասաց նա։