Ընտրություններից առաջ՝ իշխանությունները որոշել են հիմա էլ առողջության «ֆիկտիվ» ապահովագրությամբ խաբել քաղաքացիներին։ Իբր ապահովագրություն են ներդնում՝ բժշկական ծառայությունների 70 տոկոսը դուրս են թողել ապահովագրությունից։
Միայն 30 տոկոսի դեպքում են պատրաստվում ապահովագրություն տրամադրել։
Դեռ չհաշված, որ այդ 30 տոկոսի մեջ էլ ծառայությունների մի մասը լինելու են համավճարով։
Այսինքն՝ դրանց արժեքի մի մասն են տալու, մյուս մասը քաղաքացիներն են վճարելու՝ սեփական գրպանի հաշվին։ Քիչ է, ապահովագրավճար են տալու, մի բան էլ լրացուցիչ վճարելու են՝ ապահովագրության շրջանակներում բժշկական օգնություն ստանալու համար։
Հիմա սրա ի՞նչն է ապահովագրություն, որ մի բան էլ անունը դրել են համապարփակ կամ համընդհանուր ապահովագրություն։
Բժշկական ծառայությունների կեսի կեսն են մտադիր ապահովագրական փաթեթի շրջանակներում տրամադրել քաղաքացիներին։
Սա նույնիսկ մեծագույն ցանկության դեպքում դժվար է անգամ ապահովագրություն անվանել, էլ ուր մնաց թե՝ համապարփակ ապահովագրություն։ Նախկին պետպատվերի անունը վերցրել փոխել, դարձրել են ապահովագրություն, երբ պայմանական ասած՝ 10 ծառայությունից 7-ի դեպքում քաղաքացին ստիպված է լինելու վճարել, և միայն 3-ի դեպքում, եթե բախտը բերի, կարող է ընկնել ապահովագրության տակ։
Այսպիսի կեղծ ապահովագրությամբ ուզում են խաբել քաղաքացիներին։ Մարդիկ էլ կարծում են, թե կարող են այսուհետ անվճար բուժվել։
Ճռճռան թվեր են հրապարակում։ Ասում են՝ հաջորդ տարվա համար շուրջ 1.5 մլն քաղաքացիների բժշկական ապահովագրություն ենք տրամադրելու։ Հարցն այն է, թե դրա տակ ի՞նչ են ստանալու քաղաքացիները։
Այսպիսի առողջության ապահովագրություն 1.5 միլիոնի չէ, բոլորին կարող էին տրամադրել։
4-5 տարի է՝ նախապատրաստվում են ապահովագրություն ներդնելուն, բայց էլի պատրաստ չեն։ Այն, ինչ անում են, վաղը պատուհաս է դառնալու քաղաքացիների գլխին։ Դեռ կտեսնենք, թե տարեսկզբից ինչ խառնաշփոթ է ստեղծվելու. մի կողմից՝ առողջապահության համակարգում, մյուս կողմից՝ ապահովագրությունից օգտվող քաղաքացիների շրջանում։
Իրենք էլ մինչև վերջ չեն կողմնորոշվել, թե ինչպե՞ս ու ի՞նչ մեխանիզմով են իրականացնելու ապահովագրական փաթեթների տրամադրումը։
Եթե իրենք չգիտեն, պատկերացրեք, թե շահառուներն ինչ վիճակում են հայտնվելու։
Մինչև հիմա նույնիսկ ապահովագրության մասին օրենքը չեն ընդունել։ Նոր-նոր խորհրդարան են ուղարկել։ Առաջիկայում պիտի քննարկվի Ազգային ժողովում, ընդունվի, մտնի գործողության մեջ։ Դրանից հետո էլ դեռ կանոնակարգերը պիտի հաստատվեն, որ կարողանան կիրառել, իսկ տարեվերջից ընդամենը 1 ամսից մի փոքր ավել ժամանակ է մնացել։
Ինչպե՞ս են այս ամենը հասցնելու, որպեսզի հունվարի 1-ից դնեն գործողության մեջ, իրենք էլ պատկերացում չունեն։
Ոչ մեկը չգիտի, թե ի՞նչ է լինելու այն քաղաքացիների հետ, ովքեր մինչև պարտադիր ապահովագրության ներդրումն էլ առողջության բավական ընդգրկուն ապահովագրություն էին ստանում գործատուների կողմից։ Երբեմն դա տարածվում էր ոչ միայն իրենց, այլև իրենց ընտանիքների վրա։ Օրենքի ընդունումից ու կիրառության մեջ դնելուց հետո ի՞նչ է լինելու այդ քաղաքացիների հետ։ Պարտադրելո՞ւ են հրաժարվել գործատուների կողմից տրամադրվող ապահովագրական ընդգրկուն փաթեթներից, ստիպելո՞ւ են բոլորին ապահովագրել պետության կողմից ստեղծվող հատուկ հիմնադրամում, որպեսզի ստանան բժշկական ծառայությունների այն ընդամենը 30 տոկոսը, որոնք ներառվել են կառավարության նախատեսած ապահովագրական փաթեթում։ Այն դեպքում, երբ այս մարդիկ մինչ այդ օգտվում էին գործատուների կողմից տրամադրված ապահովագրական փաթեթներից, որոնք շատ ավելի համապարփակ բժշկական ծառայություններ էին պարունակում։ Երբեմն՝ ծառայությունի շատ մեծ մասը։
Իրականում այդ փաթեթներն էին, որ կարող էին կոչվել համապափակ ապահովագրություն։ Բայց կառավարությունը կարծես որոշել է դրանք վերացնել, բոլորին հավաքել մի կաթսայի մեջ ու պարտադրել իր առաջարկած խղճուկ ապահովագրական փաթեթը, որից բժշկական ծառայությունների 70 տոկոսը դուրս են թողել, որպեսզի մի կողմից՝ հնարավորինս քիչ փող ծախսեն պետության կողմից իրականացվող ապահովագրական փաթեթների վրա, մյուս կողմից՝ ձև անեն, թե առողջության ապահովագրություն են ներդրել։
Այսպիսի ապահովագրություն ավելի լավ էր չարվեր, քան թե ձևի համար արվեր։
Զարմանալի չէ, որ կառավարությունում շատերը դեմ են եղել հունվարի 1-ից բժշկական ապահովագրության ներդրմանը, որովհետև համարել են, որ պատրաստ չեն դրան։
Ներդնում են զուտ նրա համար, որ Նիկոլ Փաշինյանն է այդպես ուզում։ Որպեսզի ընտրություններից առաջ ժողովրդին ցույց տա, թե խոստացել էին ապահովագրություն ներդնել, ներդրել են։ Ոչինչ, որ դրանից քաղաքացիները գրեթե ոչինչ չեն ստանալու։ Անունը լինելու է, ամանունը՝ ոչ։
Պետական միջոցների շրջանակներում պատրաստվում են ապահովագրություն տրամադրել մինչև 18 տարեկաներին ու 65 տարեկանից բարձր թոշակառուներին, որոնք մինչ այդ էլ պետպատվերի շրջանակներում այս կամ այլ կերպ հաջողացնում էին օգտվել անվճար բժշկական ծառայություններից։
Այնպես որ, այս մարդկանց համար ապահովագրության ներդրումից հետո էլ մեծ բան չի փոխվում, եթե չասենք, որ բազմաթիվ ծառայություններ, որոնք նախկինում կարող էին ստանալ պետպատվերի շրջանակներում, հիմա ապահովագրված լինելով՝ ստիպված են լինելու վճարել։
Մնացած քաղաքացիները, որոնք այս փուլում պարտադրված կլինեն ապահովագրվել, ստիպված կլինեն դրա համար վճարել տարեկան 129.6 հազար կամ ամսեկան շուրջ 11 հազար դրամ։ Սա լրացուցիչ բեռ է լինելու քաղաքացիների, հատկապես ցածր աշխատավարձեր ստացող քաղաքացիների համար։
Սպասվող ընտրություններից առաջ նրանց դժգոհությունները մեղմելու ակնկալիքով, որոշել են հերթական խորամանկությանը դիմել. Ապահովագրավճարի մի մասը պատրաստվում են փոխհատուցել «Զինապահ» հիմնադրամի հաշվին։ Հիմնադրամի հատկացումները կկրճատեն, որպեսզի տան բժշկական ապահովագրությանը։ Համարում են, որ «Զինապահն» այլևս այդ գումարների կարիքը չունի։
ՀԱԿՈԲ ՔՈՉԱՐՅԱՆ
168.am