Ըստ եկեղեցական հրապարակախոս Անաստասիա Կոսկելլուի Հայ Առաքելական եկեղեցում պառակտումը դառնում է իրականություն, գրում է eadaily.com–ը։
Վեց արքեպիսկոպոսներ և չորս եպիսկոպոսներ, այդ թվում՝ Արցախի թեմի առաջնորդ Վրթանես Աբրահամյանը, հանդիպել են վարչապետ Նիկոլ Փաշինյանի հետ և կոչ արել Ամենայն հայոց կաթողիկոս Գարեգին Բ-ին հրաժարական տալ։
Գարեգին Բ-ն փորձել է Էջմիածնում անցկացնել Հայաստանում բնակվող Հայ Առաքելական եկեղեցու Գերագույն հոգևոր խորհրդի բոլոր անդամների ժողով, սակայն չի կարողացել քվորում ապահովել։ Փաշինյանի կողմը անցած քահանաները չեն արձագանքել կաթողիկոսի հրավերին։ «ՀՀ վարչապետի հատուկ գործողության «հաջողության» բանալին, ինչպես տեղին նշել է Կովկասի ինստիտուտի հետազոտող Հրանտ Միքայելյանը, այն է, որ «Փաշինյանը չի հորինում եկեղեցու ներսում խնդիրներ, այլ հմտորեն շահագործում է առկաները»։ Նրա խոսքով եպիսկոպոս Վրթանես Աբրահամյանի Փաշինյանի կողմ անցնելը շրջադարձային պահ է։
«Ընդ որում այդ եպիսկոպոսի ապագան հազիվ թե մտահոգի Փաշինյանին։ Եպիսկոպոսն արդեն սպառնալիքներ է ստանում, նրա քահանա եղբայրը հրապարակավ հրաժարվել է նրանից, նաև Արցախի թեմի թեմական խորհուրդն է հրաժարվել աջակցել նրան», – հայտարարել է Կոսկելլուն։
Ավելի վաղ Արցախի թեմի թեմական խորհրդի նախագահ Լեռնիկ Հովհաննիսյանը հայտարարել էր, որ չի կիսում եպիսկոպոս Աբրահամյանի վերջին օրերի դիրքորոշումն ու վարքագիծը, որոնք առաջացրել են «մեր ժողովրդի արդարացված վրդովմունքն ու զայրույթը»։ Խորհրդի նախագահը հայտնել է, որ նոյեմբերի 28-ին թեմական խորհրդի անդամները հանդիպել են Արցախի թեմի առաջնորդի հետ և կոչ արել նրան հայտարարություն անել և ներողություն խնդրել իր այն ժողովրդից, որը բռնի կերպով արտաքսվել է իր երկրից։ Սակայն, չնայած եպիսկոպոսի հավաստիացումներին, նրա հայտարարության մեջ ներողության ոչ մի խոսք չի եղել։ Լեռնիկ Հովհաննիսյանի խոսքով Արցախի թեմի առաջնորդը գործնականում հրաժարվել է ներողություն խնդրել իր ժողովրդից։ Ավելին, նրա հայտարարությունները սրել են մարդկանց վրդովմունքն ու ափսոսանքը։ Հովհաննիսյանը նաև հավելել է, որ թեմական խորհուրդը կարտահայտի իր հստակ դիրքորոշումը այդ հարցի վերաբերյալ։