Ընդհանրապես հանցագործները դիմացինին շտապում են հանցագործ կարգել՝ դրանով փորձելով մեղմել իրենց հանցագործությունների չափը կամ իրենց մեղքի բաժինը։ Այս մասին այսօր՝ դեկտեմբերի 5–ին, Երևանի ընդհանուր իրավասության դատարանի Ավան և Նոր Նորք նստավայրի դիմաց լրագրողների հետ զրույցում ասաց Արցախի ԱԺ «Արդարություն» խմբակցության պատգամավոր Մետաքսե Հակոբյանը՝ նկարագրելով այսօր իշխանության կողմից կատարվող քայլերը, մասնավորապես եկեղեցու դեմ արշավը։
Նա նշեց, որ բոլորն էլ տեսնում են, թե ովքեր են իրական հանցագործները, որոնք տարբեր մեղքերի համար կարգում են մեղավորներ. օրինակ, Արցախի հանձնման համար մեղավոր է Արցախի ժողովուրդը, հայ զինվորը, Արցախի ղեկավարությունը, Հայաստանում խնդիրների համար մեղավոր են սրբազանները, հոգևորականները։
«Իրականում, այս իշխանությունները լինելով բոլոր աղետների միակ պատասխանատուն, կարողանում են այսօր մեր հասարակությանը ճնշել ու մեղավորներ կարգել։ Սրբազաններին դատում են՝ նրանց վրա կարելով աբսուրդային հոդվածներ»,- ասաց Մ.Հակոբյանը։
Անդրադառնալով նրան, որ այլ եպիսկոպոսների հետ նաև Արցախի թեմի առաջնորդ Տեր Վրթանես եպիսկոպոս Աբրահամյանն էր հանդիպել Նիկոլ Փաշինյանին, ապա հանդես եկել հայտարարությամբ՝ խնդրելով կաթողիկոսին հրաժարական տալ, Մետաքսե Հակոբյանն ասաց. «Ես առիթ չեմ էլ փնտրել հանդիպել թեմի առաջնորդին, որովհետև հենց այդ պահից Արցախի ժողովուրդը, առանց իրար հետ շփվելու, նույն որոշում էին կայացրել՝ այլևս այդ անձին չենք ընկալում, ընդունում որպես Արցախի թեմի առաջնորդ։ Ըստ էության, երևի թե օրինաչափ էր իր պահվածքի ավարտը, բայց մեզ համար այս ծայրահեղությունն անսպասելի էր»։ Նա նկատեց, որ թեմի առաջնորդը Արդախի բլոկադայի ժամանակ Արցախում չէր, բացի այդ, ռուս խաղաղապահների Արցախում եղած ժամանակ էլ չի փորձել վերադառնալ Արցախ։
Նշենք, որ ՔԿ–ի փոխանցմամբ՝ Արշակ արքեպիսկոպոս Խաչատրյանի նկատմամբ հարուցվել է հանրային քրեական հետապնդում՝ Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով (մի խումբ անձանց կողմից նախնական համաձայնությամբ թմրամիջոց ապօրինի իրացնելը՝ հանդիսադիր վայրում)։
Փաստաբանի խոսքով, Արշակ Սրբազանը դեռ ասուլիսից սկսած պատրաստ էր նման զարգացումների։