Ադրբեջանը հերթական անգամ անհեթեթ պահանջներ է հնչեցրել՝ Հայաստանում բնակեցնել 300 հազար ադրբեջանցու։ Այս մասին հայտարարվել է Բաքվում ընթացող «Մշակութային ժառանգություն եւ վերադարձի իրավունք. Հայաստանից արտաքսված ադրբեջանցիների մշակութային ժառանգության վերականգնումը՝ որպես արդարության, հաշտեցման եւ խաղաղության ուղի» համաժողովում։
«Արեւմտյան Ադրբեջան համայնքը կազմակերպություն է, որը միավորում է հազարավոր մարդկանց, որոնք վերջին 200 տարիների ընթացքում փուլ առ փուլ արտաքսվել են Հայաստանից»,- հայտնել է Ադրբեջանի իշխանությունների ստեղծած «համայնքի» վարչության նախագահ Ազիզ Ալեքբերովը։ Նրա խոսքով՝ կազմակերպության նպատակը «հայրենի հողեր ավելի քան 300 հազար փախստականների, որոնք հարկադրաբար հեռացել են իրենց պատմական բնակության վայրերից, վերադարձի» ապահովումն է։
Հիշեցնենք, որ Ադրբեջանը աչք է դրել Սյունիքի մարզի վրա։ Եթե ՀՀ իշխանությունները իրենց հոգու շռայլությամբ համաձայնեն այս արկածախնդրական պահանջներին, Ադրբեջանի հաջորդ քայլը կդառնա Զանգեզուրը գրավելու փորձը։ Ադրբեջանն իր պահանջներն ամրացնում է «պատմական փաստերով», որոնք դրոշմում է Ադրբեջանի ԳԱԱ-ն։