Եվրոպացի պաշտոնյաները սկսել են վախենալ, որ ԱՄՆ նախագահ Դոնալդ Թրամփը կհեռանա Ուկրաինայի խաղաղության բանակցություններից՝ առաջընթացի բացակայության պատճառով, հաղորդում է CNN-ը: Նրանք ասում են, որ ամերիկացի առաջնորդը կարող է մեղադրել Կիևին և եվրոպական մայրաքաղաքներին գործարքի ձախողման համար: «Անվերջ պատերազմը նրա համար ավելի ու ավելի մեծ քաղաքական պատասխանատվություն է դառնում», – CNN-ին հաստատել է ամերիկացի բարձրաստիճան պաշտոնյան:
Միևնույն ժամանակ, ԵՄ-ում Wall Street Journal-ի (WSJ) աղբյուրները նշել են, որ ԱՄՆ-ին, Ուկրաինային և Ռուսաստանին կարող են «շաբաթներ կամ ամիսներ» պետք գալ՝ խաղաղության ծրագրի հիմնական կետերի շուրջ առկա հակասությունները լուծելու համար։ «Մենք գիտենք, որ ամերիկացիները ցանկանում են արագ արդյունքների հասնել։ Մյուս կողմից, դժվար է պատկերացնել, թե ինչպես կարող ենք արագ արդյունքներ ունենալ, հաշվի առնելով քննարկվող հարցերի բարդությունը», – ասել է պարբերականի զրուցակիցներից մեկը։ Մինչդեռ, Financial Times-ի աղբյուրների համաձայն, Թրամփը Ուկրաինայի նախագահ Վլադիմիր Զելենսկուն «մի քանի օր» է տվել՝ ԱՄՆ-ի խաղաղության ծրագրին համաձայնելու համար։ Ընդ որում, ամերիկյան առաջնորդը հույս ունի համաձայնագիր կնքել մինչև Սուրբ Ծնունդ, որը Ամերիկայում նշում են դեկտեմբերի 25-ին։ «ՌԲԿ-Ուկրաինա»-ի կիևյան աղբյուրը հաստատել է, որ Թրամփը Զելենսկուց արագ պատասխան է ակնկալում, բայց կոնկրետ վերջնաժամկետ չի սահմանել։
Նոյեմբերի կեսերին ԱՄՆ-ն ներկայացրել է Ուկրաինայի շուրջ խաղաղության 28 կետանոց ծրագիր, որը հետագայում քննարկվել է Կիևի և Մոսկվայի հետ։ WSJ-ի զրուցակցի խոսքով, վիճելի են մնում երեք կետ՝ ուկրաինական կողմի տարածքային զիջումները, ապագայում Կիևի՝ ՆԱՏՕ-ին միանալու հնարավորությունը, ինչպես նաև Ուկրաինայի վերականգնման համար սառեցված ռուսական ակտիվների օգտագործման մեխանիզմը։ Axios-ի ուկրաինական աղբյուրները նշել են, որ ԱՄՆ-ը սկսել է ճնշում գործադրել Զելենսկու վրա՝ պահանջելով նրանից արագ համաձայնել խաղաղության ծրագրին։ Սակայն ուկրաինացի առաջնորդը հայտնել է, որ խաղաղության համաձայնագրի 20 կետից բաղկացած թարմացված տարբերակը ԱՄՆ-ին կփոխանցի դեկտեմբերի 10-ին։ Այս փաստաթուղթը կպատրաստվի եվրոպական երկրների ղեկավարների հետ խորհրդակցություններից հետո։
Այս ֆոնին ՆԱՏՕ-ում ԱՄՆ մշտական ներկայացուցիչ Մեթյու Ուիթաքերը հայտարարել է, որ Թրամփը կարող է հրաժարվել Ուկրաինայում հակամարտության կարգավորմանն ուղղված ջանքերից, եթե որոշի, որ Մոսկվայի և Կիևի միջև խաղաղության համաձայնագիր կնքելն անհնար է։