Ընձառյուծը տան մոտ հարձակվել է մի աղջկա վրա։ Լուրը հաղորդում է հնդկական «Greater Kashmir»-ը։
Դեպքը տեղի է ունեցել Քաշմիրում։ Վայրի կենդանին բռնել է հինգ տարեկան երեխային և քարշ տվել թփերի մեջ։ Երբ տեղի բնակիչները իմացել են դեպքի մասին, սկսել են որոնումները։ Աղջկան գտել են թփուտային տարածքում՝ «բնակեցված վայրից որոշակի հեռավորության վրա», բայց չեն կարողացել փրկել նրա կյանքը։
Իրավիճակը խուճապ է առաջացրել տեղի բնակիչների շրջանում։ Նրանց խոսքով՝ ընձառյուծները այդ տարածքում հաճախ են հարձակվում մարդկանց վրա, ինչը վտանգավոր է դարձնում արևամուտից հետո տարածաշրջանում ճանապարհորդելը, հատկապես երեխաների համար։
Անտառային վարչության պաշտոնյաները խորհուրդ են տվել մարդկանց, եթե հնարավոր է, խուսափել միայնակ քայլելուց, հատկապես գիշերը։ Անտառային վարչության պաշտոնյաները ներկայումս փորձում են բռնել ընձառյուծին։