Օրերս Ադրբեջանից Վրաստանի տարածքով Հայաստան ժամանեց նավթամթերքով բեռնված գնացքը՝ 22 վագոն բենզինով։
Վաշինգտոնում ձեռք բերված պայմանավորվածություններով՝ Հայաստանի և Ադրբեջանի միջև հաստատված խաղաղությունը հերթական արդյունքն է տալիս՝ տնտեսական համագործակցության խթանմամբ:
Ադրբեջանական բենզինը գնած «Մեգա թրեյդ» ընկերության տնօրեն Կարեն Հայրիյանը «Ազատությանը» փոխանցել էր, որ АИ 95 պրեմիում տեսակի բենզինը կվաճառվի 440 դրամով:
Էներգետիկ փորձագետ Արթուր Ավետիսյանն Aysor.am-ի հետ զրույցում նշեց՝ ներմուծված բենզինը ծավալային առումով այդքան էլ մեծ չէ, որ ՀՀ շուկայում դրանով ինչ-որ բան փոխվի. «Դա ավելի շատ քաղաքական քայլ էր։ Շատ եմ տեսնում քննարկումներ՝ արդյո՞ք դա ադրբեջանական բենզին է, թե՞ ոչ։ Տեխնիկապես անհնար է իմանալ այդ ամենը, քանի որ Ադրբեջանի տարածքից է ներմուծվել և նրանք այդ տեսակի մակնիշի բենզին արտադրում են, ինչպես նաև ներկրում եմ երրորդ երկրներից։ Այստեղ շատ ավելի կարևոր է հասկանալ, թե ինչի համար է դա արվում և ինչ հետևանքների առաջ կարող է կանգնեցնել։
Իմ կարծիքով՝ Ադրբեջանը դեռևս շարունակում է թշնամաբար դիրքավորված լինել մեր նկատմամբ՝ ի հեճուկս իրենց հայտարարությունների։ Իրական քայլեր, որոնք կբերեն իրական խաղաղության՝ չկան, դեռևս կիսաքայլեր են։ Որպեսզի տնտեսությունը շնչահեղձ չլինի, պետք է առևտրաշրջանառություն լինի, ոչ թե միակողմանի առևտուր՝ ցանկացած պետության հետ։ Եթե առևտուրը միակողմանի է, դա կարող է բերել տնտեսական կախվածության։ Եթե Ադրբեջանը լինի մեր համար նույնիսկ ամենաբարեկամ երկիրը, նույնիսկ այդ պարագայում էլ միակողմանի առևտուրն այդքան էլ ճիշտ չէ։ Ես դեռևս չունեմ տեղեկություն, որ Հայաստանից X ապրանք արտահանվել է Ադրբեջան, արդյո՞ք այդ ուղղությամբ աշխատանքներ տարվում են, թե՞ ոչ։ Երբ լինի, այդ ժամանակ կլինի իրական տնտեսական խաղաղություն։ Հայաստանը պետք է մտածի առևտրաշրջանառության մասին, այլ ոչ թե՝ միակողմանի առևտրի»։
Նա շեշտեց, որ այս անգամ Վրաստանը, որպես բարի կամքի դրսևորում, տարանցման գումար չի վերցրել. «Հայաստանի համար ամենամեծ խնդիրը լոգիստիկան է։ Ապրանքների հիմնականում թանկությունը պայմանավորված է լոգիստիկայի բացակայությամբ կամ դժվարությամբ։ Եթե նոր խմբաքանակի մասին խոսվի, այդ դեպքում արդյո՞ք Վրաստանը դարձյալ տարանցման գումարը չի վերցնի, իսկ եթե վերցնի, ապա ի՞նչ տոկոսադրույքով։ Միայն այդ դեպքում կարող ենք հասկանալ՝ մեզ սա ձեռնտո՞ւ է, թե՞ ոչ։
Կազմակերպիչներն էլ չեն ժխտում, որ սա ավելի շատ խաղաղության տրամաբանության մեջ արված քայլ է։ Այդ 22 վագոն բենզինը չի կարող Հայաստանի շուկայում լուրջ դերակատարում ունենալ՝ ո՛չ ծավալային, ո՛չ գնային իմաստով»։