Ռուսական ուժերը գիշերը և դեկտեմբերի 23-ի առավոտյան զանգվածային հարված են հասցրել Ուկրաինային։ Իշխանությունների տվյալներով՝ հարվածների հիմնական թիրախն էներգետիկ օբյեկտներն են եղել։ Էլեկտրաէներգիայի անջատումներ են գրանցվել մի քանի շրջաններում և Կիևում, գրում է Current time-ը։ Հարձակման հետևանքով երեք մարդ զոհվել է, մի քանիսը՝ վիրավորվել։ Կիևի Սվյատոշինսկի շրջանում անօդաչու թռչող սարք է ընկել հինգհարկանի բնակելի շենքի մոտ՝ վնասելով այն։ Մայրաքաղաքի մոտ գտնվող Վիշգորոդի շրջանում էլ ռուսական հարձակման հետևանքով մասնավոր տանը հրդեհ է բռնկվել։
Զոհվել է տարեց կին, երեք մարդ վիրավորվել է։ Օդեսայի մարզի մի քանի շրջաններում էներգետիկ, նավահանգստային, տրանսպորտային, արդյունաբերական և բնակելի ենթակառուցվածքների է վնաս հասցվել։ Մարզային վարչակազմի ղեկավար Օլեգ Կիպերը հայտնել է նաև քաղաքացիական բեռնատար նավի վնասվելու մասին։ Ժիտոմիրի մարզում թևավոր հրթիռներով և անօդաչու թռչող սարքերով հարձակման հետևանքով վնասվել են բնակելի շենքեր և քաղաքացիական օբյեկտներ: Մարզային վարչակազմի ղեկավար Յուրի Բունեչկոյի խոսքով՝ զոհվել է 2021 թվականին ծնված երեխա: Վիրավորվել է առնվազն հինգ մարդ, այդ թվում՝ մեկ երեխա:
Հարվածները, այդ թվում՝ թևավոր հրթիռներով, ուղղված են եղել Ուկրաինայի արևմտյան շրջաններին։ Էլեկտրաէներգիայի անջատումներ են սկսվել Տերնոպոլում և Խմելնիցկիում։ Խմելնիցկիի մարզային իշխանությունները հայտնել են մեկ զոհի մասին։
Հարվածներ են հասցվել նաև Ռովնոյին, թիրախում, ըստ որոշ տեղեկությունների, դարձյալ էներգետիկ օբյեկտներն են։ Լեհաստանը կործանիչներ է օդ բարձրացրել՝ ի պատասխան հարձակման, սակայն մինչ այժմ Լեհաստանի օդային տարածքի խախտման մասին հաղորդագրություններ չեն եղել։ Ուկրաինայի ռազմաօդային ուժերը դեռևս չեն հայտնել երկրի վրա արձակված անօդաչու թռչող սարքերի և հրթիռների քանակի մասին։ Ռուսաստանը հարվածները չի մեկնաբանել։