Քաղաքական բեմադրությունը երբեմն զվարճալի է, սակայն մեծ մասմաբ հիասթափություն է առաջացնում։ Այդօրինակ մի բեմադրություն էր օրեր առաջ «Red Store» խանութի փակումն ու մեկ օր անց բացումը։
«Փակեք էդ խանութը, ձևը գտեք, փակեք էդ խանութը, ստուգելու եմ։ Չգիտեմ՝ ասածս ինչքանով է… փակեք այդ խանութը, այդ խանութում առևտուր պետք է չլինի։ Իմ վրա եմ վերցնում անձնական պատասխանատվությունը ու ամեն օր կողքով անցնելու եմ, մինչև անձնական թույլտվությունս չլինի, այդ խանութը պիտի չբացվի։ Կզեկուցեք անձամբ»,- դեկտեմբերի 18-ին Կառավարության նիստում ՊԵԿ նախագահին հրահանգել էր վարչապետ Նիկոլ Փաշինյանը։
Փակելու հրահանգի պատճառն այն էր, որ վարչապետի աշխատակազմի ներկայացուցիչներն այդ խանութից առևտուր անելիս տեղեկացել էին կանխիկի և քարտային վճարման դեպքում տարբեր գների մասին։
Ավելի ուշ ՔՊ-ի կուսակցական civic.am կայքը տեղեկացրեց, որ վարչապետի խոսքը «Red Store» խանութների ցանցի մասին է, որոնք այս հայտարարությունից շատ չանցած՝ փակվեցին։
ՊԵԿ-ը շտապ գործի անցավ, մի քանի օր անց հայտարարություն տարածեց, որ դեկտեմբերի 18-ի Կառավարության նիստում վարչապետի կողմից նշված հարկ վճարողի նկատմամբ իրականացվել են օպերատիվ-հետախուզական միջոցառումներ և հարկային վարչարարություն։ Ավելին՝ պարզվեց, որ ՊԵԿ-ն ընկերության նկատմամբ օպերատիվ-հետախուզական միջոցառումներ են ձեռնարկվել դեռևս 2024-ի սեպտեմբերից։ ՊԵԿ-ը մի շատ արագ պարզեց, որ ընկերությունում առկա ստվերային շրջանառությունից չի հաշվարկվել և չի վճարվել 95․7 մլն դրամի հարկային պարտավորություն։
Այսպիսով՝ աշխարհի բոլոր մեղքերը միանգամից վերագրվեցին «Red Store»-ին։ Ու տպավորություն ստեղծվեց, թե այս խանութները շատ երկար կմնան փակ։ Սակայն դեկտեմբերի 22-ին «Red Store»-ն իր ֆեյսբուքյան էջում հայտարարեց, որ երկու խանութ-սրահներն արդեն բացվել են, մյուսները շատ շուտով կբացվեն
Այս գրոտեսկային պատմությունը փորձենք տրամաբանական վերլուծության ենթարկել ու պարզել՝ Փաշինյանի անձնական հանձնարարությա՞մբ է վերաբացվել այս խանութը։ Եվ արդյո՞ք սա բեմադրություն չէր։
Ենթադրելի է, որ «Red Store»-ն ինչ-որ կապ ունի ՔՊ-ական իշխանության հետ։ Այս ենթադրության օգտին է խոսում այն, որ վարչապետի մարդիկ բազմաթիվ նմանատիպ խանութների շարքից ընտրել են հենց սա ու այնտեղից են առևտուր արել։ Այս գործընկերությունը, հավանաբար, ունի գին։ Ասում են, թե «Red Store»-ն «Իմ քայլի» նվիրատուներից է, գումարներ է նվիրաբերել «Կրթվելը նորաձև է» արշավին։ Դրա արդյունքում էլ այդպիսի ուշադրության է արժանացել, որ նույնիսկ վարչապետի աշխատակիցներն են այդ խանութներից տեխնիկա գնում։ «Red Store»-ն այնքան վստահ է եղել ՔՊ-ի հետ գործընկերության ամրութան վրա, որ առանց վախենալու՝ տարբերություն է դրել կանխիկ ու քարտով վճարելու պարագայում ապրանքի գների միջև։
Հանրային խոսույթում շրջանառվող մեկ այլ վարկածով էլ ենթադրվում է, թե խնդրին միջամտել է «Իմ քայլը» հիմնադրամի ղեկավար Աննա Հակոբյանը և Նիկոլ Փաշինյանին խնդրել է վերանայել «Red Store»-ը փակելու որոշումը։ Փաշինյանն էլ հոժարակամ կատարել է Աննա Հակոբյանի խնդրանքը, անձամբ հրահանգել է կասեցնել «Red Store»-ի դեմ բացված վարույթներն ու թույլատրել, որ վերաբացվեն խանութները։ Իսկ եթե այս ենթադրությունը ճիշտ չէ, և Աննա Հակոբյանը չի միջամտել խանութի բացման հարցում, ապա նշանակում է, որ «Red Store»-ի փակման ու բացման պատմությունը էժան բեմադրություն էր՝ ուղղված այլ տնտեսվարողներին, որ նման տարբերակված գներ չառաջարկեն գնորդներին։
Կարճ ասած՝ այս պատմության շուրջ վարկածները դեռ միանշանակ պատասխան չեն տալիս կարևոր հարցին, թե «Red Store»-ի վերաբացումը կատարվել է Փաշինյանի անձնակա՞ն հանձնարարությամբ, Աննա Հակոբյանի՞ միջամտությամբ, թե՞ ավելի ազդեցիկ լծակներ օգտագործելով։
© ORAGIR.NEWS