Ադրբեջանի նախագահ Իլհամ Ալիևն Արցախի տարածքում՝ Աղդամում, իր ընտանիքին պատկանող ընկերության երկրորդ հյուրանոցն է բացել, հաղորդում է Meydan TV-ն։ Դեկտեմբերի 23-ին Իլհամ Ալիևը մասնակցել է «Hilton Garden Inn Agdam» հյուրանոցի բացմանը։ Ավելի քան 2 հեկտար ընդհանուր մակերեսով հյուրանոցն ունի 2, 6 և 7 հարկ, 3 շենք, 287 տեղ և, ընդհանուր առմամբ, 127 սենյակ։ Այստեղ ստեղծվել են ռեստորան, հանրային սննդի գոտի, հանդիպումների, միջոցառումների և խնջույքների սրահներ, փակ լողավազան և մարզասրահ։
Այս նախագիծը, որը համաշխարհային Hilton ապրանքանիշերի ընտանիքի մաս է կազմում, Աղդամում շահագործման հանձնված երկրորդ հյուրանոցային նախագիծն է Agdam City Hotel հյուրանոցից հետո՝ շարունակելով TABIA Group-ի կողմից տարածաշրջաններում իրականացվող ռազմավարական ներդրումային գիծը։ TABIA Group-ը, որը նախկինում հայտնի էր որպես PMD Hospitality, հիմնադրվել է 2016 թվականին։ Այն փոխել է իր անվանումը 2023 թվականին։ 123 միլիոն մանաթ կապիտալով ընկերությունը մատուցում է հյուրանոցների կառավարման ծառայություններ, հանգստի կենտրոններ և առողջապահական համալիրներ։ Ընկերության պորտֆելը ներառում է մի քանի 5-աստղանի հյուրանոցներ և մի քանի հանգստի կենտրոններ։
Նշվում է, որ PMD Hospitality ՍՊԸ-ն PMD Group ընկերության դուստր ձեռնարկությունն է: PMD Group ընկերությունը, որը զբաղվում է գյուղատնտեսությամբ, վերամշակմամբ, շինարարությամբ, հյուրանոցային կառավարմամբ և բանկային գործունեությամբ, համարվում է Pasha Holding-ի դուստր ձեռնարկություն: «Pasha Holding» ընկերությունների խումբը՝ իր երեք դուստր ձեռնարկությունների միջոցով («Absheron Hotel Group» ՍՊԸ, «TABIA Group» ՍՊԸ և «PMD Group» ՍՊԸ), տիրապետում և կառավարում է մոտ 30 շքեղ հյուրանոց, հանգստի կենտրոն և հանգստավայր-վիլլաներ Ադրբեջանում, Թուրքիայում և Վրաստանում:
Երեք ընկերություններն էլ գրանցված են Նեֆթչիլար պողոտա 153 հասցեում: Այստեղ է գտնվում Pasha Holding-ի գլխավոր գրասենյակը՝ «Port Baku Towers»-ը: Արդյունքում՝ Իլհամ Ալիևի կողմից Աղդամում բացված երկրորդ հյուրանոցը պատկանում է TABIA ընկերությունների խմբին: TABIA Group LLC-ն գործում է PMD ընկերությունների խմբի հովանու ներքո, որը պատկանում է նախագահական ընտանիքին:Երկու ընկերություններն էլ Ալիևի դուստրերին պատկանող Pasha Holding-ի դուստր ընկերություններն են: