Դետրոյթի արվարձանը համաձայնել է 3,25 միլիոն դոլար փոխհատուցում վճարել այն երիտասարդ կնոջ ընտանիքին, որը մահացած էր ճանաչվել իր տանը, բայց հետո խեղդվել և աչքերը բացել էր, երբ հուղարկավորության բյուրոյում բացել էին դիակի պարկի կայծակ ճարմանդը, հաղորդում է Associated Press-ը։
Սաութֆիլդի շտապօգնության բժիշկներին մեղադրանք է առաջադրվել Թայմշա Բոշամպի խնամքի հարցում կոպիտ անփութության համար՝ 2020 թվականին 911 զանգից հետո։ Ուղեղային կաթվածից տառապող 20-ամյա բուժառուն ի վերջո տեղափոխվել է հիվանդանոց և երկու ամիս անց մահացել։
«Մենք գիտակցում ենք, որ ոչ մի լուծում չի կարող չեղարկել 2020 թվականի օգոստոսի 23-ին տեղի ունեցած խոր ողբերգությունը կամ մեղմել տիկին Բոշամպի ընտանիքի ցավը,- ասված է Սաութֆիլդի հայտարարության մեջ։ -Այս գործը ներառում էր չափազանց դժվարին հանգամանքներ, որոնք առաջացել են համաշխարհային համավարակի բարդ աշխարհում»։
Կինը սկսել է դժվարությամբ շնչել, երբ նրա ընտանիքը զանգահարել է 911: Բժշկական անձնակազմը փորձել է վերակենդանացնել նրան և խորհրդակցեց բժշկի հետ, որը հեռախոսով, առանց տուն մտնելու հայտարարել է բուժառուի մահվան մասին: Նույն օրը ավելի ուշ թաղման բյուրոյի աշխատակիցները բացել են դիակի համար նախատեսված պարկը և տեսել, որ Բոշամփը շնչահեղձ է լինում: Նրան շտապ հիվանդանոց են տեղափոխել, բայց կինն այդպես էլ գիտակցության չի եկել։
Ըստ նրա փաստաբանի՝ բուժաշխատողները նշել են, որ Բոշամփը կփրկվեր, եթե նրան անմիջապես տնից հիվանդանոց տեղափոխեին։
Սաութֆիլդ քաղաքը պայքարել է հայցի դեմ և դատավորին համոզել մերժել այն՝ կառավարության անձեռնմխելիության հիմքով: Սակայն 2024 թվականին Միչիգանի վերաքննիչ դատարանը չեղյալ է հայտարարել այդ որոշումը: Սաութֆիլդի հրշեջ ծառայության պետը նշել է, որ Բոշամփի իրավիճակը կարող է կապված լինել «Ղազարոսի համախտանիշի» հետ, որը մի վիճակ է, որի դեպքում մարդիկ վերակենդանանում են առանց օգնության՝ անհաջող վերակենդանացման փորձերից հետո: