TikTok-յան հարթակում խարդախության և դրամաշորթության հերթական ձևն է տարածվում, ըստ որի՝ ՀՀ քաղաքացիները, որոնք ծնվել են 1949-2015 թվականներին սոցիալական ֆոնդից կսկսեն ստանալ 350.000 դրամ։ Այս մասին տեղեկացնում է ՀՀ աշխատանքի և սոցիալական հարցերի նախարար Արսեն Թորոսյանը։
«Հերթական խարդախությունն է տարածվում սոցիալական ցանցերում և հատկապես TikTok-ում։ Այդ պրոֆիլում տելեգրամյան մի ալիքի հղում է դրված, որ բացելուց հետո ձեզնից սկսելու են անձնական տվյալներ ուզել, ընդհուպ մինչև բանկային, քարտային տվյալներ, ասելու համար, որ փոխանցելու են գումարն այդ քարտին, բայց դրա ամբողջ իմաստը բանկային հաշիվներից ու քարտերից դրամ շորթելն է»,-ասել է Թորոսյանը։
Նա հորդորել է քաղաքացիներին չտրվել դրամաշորթության և խարդախության այս դասական օրինակին և անտեսել նմանատիպ տեսանյութերը։