ԱՄՆ-ը որոշել է Հարավչինական ծովից Մերձավոր Արևելք տեղափոխել ավիակիր հարվածային խումբը՝ ԱՄՆ նախագահ Դոնալդ Թրամփի՝ Իրանին «նախկինում չտեսնված հարվածներ» հասցնելու սպառնալիքների ֆոնին, հայտնել է NewsNation-ի իրազեկ աղբյուրը: Ըստ նրա՝ տարածաշրջան ուղղվող ռազմածովային խումբը գլխավորում է USS Abraham Lincoln ավիակիրը։ Մոտ մեկ շաբաթից՝ նավերը, ներառյալ մեկ սուզանավ, պետք է ժամանեն նշանակման վայր։ Ընդ որում, դրանք գտնվելու են ԱՄՆ Կենտրոնական հրամանատարության (CENTCOM) պատասխանատվության գոտում, որն ընդգրկում է 21 երկիր, այդ թվում՝ Իրանը, հստակեցրել է պարբերականի զրուցակիցը։
Իր հերթին իրանական իշխանությունները ավիացիայի համար փակել են օդային տարածքը՝ բացառությամբ որոշ թույլատրված միջազգային չվերթների։ Tasnim գործակալության տվյալներով՝ Իսլամական Հանրապետության հակաօդային պաշտպանության հրամանատարությանը հրաման է տրվել անհապաղ կրակ բացել ցանկացած թռչող սարքի վրա, որը ներխուժում է երկրի օդային տարածք՝ առանց հստակ նույնականացման։ Դրան զուգահեռ՝ արտաքին սպառնալիքների պատճառով Իսլամական հեղափոխության պահապանների կորպուսի (ԻՀՊԿ) ստորաբաժանումները բերվել են առավելագույն մարտական պատրաստվածության վիճակի։
ԱՄՆ-ի և Իրանի միջև լարվածության վերջին սրումը տեղի է ունեցել 1979 թվականի Իսլամական հեղափոխությունից ի վեր երկրում տեղի ունեցող ամենամեծ բողոքի ցույցերի ֆոնին։ Դրանք առաջացել էին տնտեսական խնդիրներից՝ կտրուկ աճող գնաճից և տեղական արժույթի արժեզրկումից։ Մարդու իրավունքների պաշտպանների տվյալներով՝ Իրանում տեղի ունեցած բողոքի ցույցերի ժամանակ ավելի քան 2500 մարդ է զոհվել։
Թրամփը հայտարարել է, որ դիտարկում է երկրում բողոքի ցույցերի ճնշմանը արձագանքելու ռազմական տարբերակները: NBC News-ի աղբյուրների փոխանցմամբ՝ նա ցանկանում է, որ ԱՄՆ զինված ուժերը «վճռական հարված» հասցնեն իրանական ռեժիմին և խուսափեն երկարատև պատերազմ հրահրելուց: Սակայն, հեռուստաընկերության աղբյուրները նշել են, որ ամերիկացի առաջնորդի խորհրդականները մինչ այժմ չեն կարողացել երաշխավորել, որ իրանական ռեժիմը արագ կփլուզվի ԱՄՆ ռազմական հարվածից հետո:
Թեհրանը խոստացել է ԱՄՆ-ի հնարավոր հարձակմանը պատասխանել Կատարի Ալ Ուդեյդի ռազմաօդային բազայի վրա հարվածներով, որտեղ էլ այժմ ամերիկյան զորքեր են տեղակայաված: Washington Post-ի տվյալներով՝ Պենտագոնն արդեն սկսել է զորքերը տեղափոխել այդ օբյեկտից այլ վայրեր: Կատարի կառավարությունը հայտարարել է, որ ամերիկյան անձնակազմի և սարքավորումների կրճատումը անհրաժեշտ արձագանք էր «տարածաշրջանում առկա լարվածությանը»: