Մեզ համար ողջունելի է յուրաքանչյուր հայի վերադարձը Բաքվից։ Այս մասին հրավիրված ասուլիսում ասաց ՄԻԵԴ-ում հայ գերիների շահերի ներկայացուցիչ Սիրանուշ Սահակյանը։
«Հատկապես կարևոր էր այս փուլում, քանի որ վերջին վերադարձն ունեցել էինք 2023 թվականին։ Այս ազատ արձակումը հույս է առաջացնում, որ կարող է շարունակական լինել»,- նշեց նա։
Սահակյանի գնահատմամբ՝ գերիների յուրաքանչյուր վերադարձի հետևում կան քաղաքական պայմանավորվածություններ, ուստի, իր գնահատմամբ, վերադարձը հնարավոր է բացառապես հանրային իշխանության ներկայացուցիչների ներգրավմամբ։
«Առանց նրանց ներգրավման, առանց բանակցային գործընթացի՝ հարցը կտանենք փակուղի, դրա համար լավագույն մոդելը փոխհամագործակցված կերպով գործելն է»,- ընդգծեց նա։
Ինչ վերաբերում է սիրիացի վարձկաններին, ապա պետք է ճշտել, թե արդյո՞ք Սիրիայի և ՀՀ-ի միջև կան համաձայնագրեր։ Միևնույն ժամանակ, Սահակյանը նկատեց, որ վարձկանությունը սովորական հանցագործություն չէ, վարձկանությունը արգելող, դրա դեմ պայքարն ուժեղացնող մեխանիզմներ կան, դա վտանգավոր է, որովհետև հաճախ օգտագործվում է՝ ազգերի ինքնորոշման իրավունքը բռնաճնշելու համար։