Նայեք, տեսեք՝ Ամերիկան ինչպես է վարվում մյուսների հետ, այսինքն Հայաստանը ինչպես կարող է ինչ-որ վետոյի մասին ծպտուն հանել։ Այս մասին, այսօր՝ հունվարի 20–ին, ԱԺ–ում լրագրողների հետ զրույցում նշեց «Հայաստան» խմբակցության պատգամավոր ՀՅԴ–ական Արմեն Ռուստամյանը՝ անդրադառնալով նրան, որ TRIPP ընկերության շրջանակներում Հայաստանը կարող է իր կենսական շահերին առնչվող հարցերում վետո կիրառել և առանց իր համաձայնության չի կարող որոշում կայացվել։
«Իշխանությունների ասելով մենք ունենք արդեն մեր երազած Հայաստանը, որը պետք է մենք գովերգենք։ Այսօր Հայաստան որպես պետություն չկա, կա Նիկոլ Փաշինյանի կալվածք, որը ինքը տնօրինում է»,–ասաց նա։
Դիտարկմանը, որ ներդրումների չափով է պայմանավորված, որ այդ ընկերությունում ԱՄՆ–ի բաժինը 74% է, Ռուստամյանն ասաց. «Չի կարող այդպիսի բան լինել, որ քո տարածքով անցնի ու դու գոնե կես-կես չլինես։ Սա այն աստիճանի նվաստացնող բան է։ Ինչի՞ց են սկսել բանակցելը, որ հասել են 26%-ի։ Շատ ճիշտ էր մեկնաբանել պարոն Օսկանյանը, այսինքն եթե լուռ նստեինք այնտեղ, կարող է մի քիչ ավելի լավ վիճակ ունենայինք»։
ՔՊ–ականների պնդմանը, որ նախկին իշխանությունները «գույք պարտքի դիմաց» գործարքով ընկերություններ են տվել Ռուսաստանին, որոնք 100 տոկոսով են դարձել ռուսական, նա նկատեց. «Բազմիցս բացատրվել է, թե ինչքան օգուտ է տվել Հայաստանին «գույք պարտքի դիմացը», այսօր էլ ապացուցվում է, որ այն գործարանները, որոնք չէին աշխատում, առնվազն սկսեցին շնչել։
Իրենք այնքան բաներ են աղավաղում, իրենց ասելով մենք մինչև 2018 թիվը լրիվ սխալ ենք ապրել, ընդհանրապես որպես ազգ, և 2018 թվից իրենք մի հատ պայծառ ապագա են մեզ բերել, որ տեսնում ենք՝ այդ ապագան ինչ է տալիս։ Մենք անընդհատ զիջելով գալիս ենք։
Մենք սուբյեկտ չենք բանակցությունների, մենք օբյեկտ ենք, մենք սեղանի վրա ենք, մենք սեղանի շուրջ չենք։ Մենք այնտեղ նստում ենք ձևական բուտաֆորիայի նման, բայց մնացածները որոշում են, թե մեզ ինչ տան, ինչ կրճոններ մեզ տրամադրեն։
Այդ փաստաթղթում իրավական ուժ ունեցող որևէ բան չկա։ Կա իրավական ուժ ունեցող մեկ այլ բան, որը այդ ստորագրած հինգ կետերից մեկն է, որ անխոչընդոտ պետք է կապ ապահովվի Ադրբեջանի երկու մասերի միջև։ Դրա հետ կապված մանրամասնություններ կան և դեռ լինելու են։
Ասում են՝ մենք այնտեղ ներկա ենք լինելու, սահմանապահ, որպես անձնագրեր են մենք ստուգելու, սահմանապահություն ենք անելու, մաքսային մենք ծառայություններն ենք անելու, բայց խորամանկորեն գրել են՝ «ֆրոնտ օֆիս», «բեք օֆիս» հասկացությունները։ Սա ի՞նչ է նշանակում, մենք լինելու ենք բեք օֆիսում նստած, ֆրոնտ օֆիսը կորոշի ամերիկյան այդ կազմակերպությունը և կապահովվի Ալիևի պահանջը, այսինքն իրենք չպիտի տեսնեն հայ ոստիկանի կամ հայ սահմանապահի դեմք։
Այն ինչ որ լսում ենք, այն ինչ որ լսում ենք օրինակ, դժբախտաբար եմ դա ասում, դժբախտաբար, այն ինչ որ լսում ենք մեր հարևաններից, թուրք-ադրբեջանական տանդեմի կողմից, դրանք իրականացվում են, ինչ որ լսում ենք հայկական կողմից, դրա հակառակն է տեղի ունենում»,– ընդգծեց Ռուստամյանը։