Մոտ մեկ ամիս առաջ ՀՀ Քննչական կոմիտեի աշխատակիցները խուզարկություն էին իրականացրել ՀՀ-ում Արցախի ներկայացուցչության շենքում։ Մի քանի ժամ տևած գործողություններից հետո իրավապահները հեռացել էին՝ որևէ առարկա չառգրավելով։
Այդ օրը ներկայացուցչությունում գտնվող փաստաբան Ռոման Երիցյանը հայտարարել էր, որ տեղի ունեցածը թեև ներկայացվում է որպես «իրավական գործընթաց», իրականում ունի քաղաքական ենթատեքստ։ Նա լրագրողներին ցույց էր տվել չհրկիզվող բաց պահարանը, որը բացվել էր փրկարար ծառայության աշխատակիցների օգնությամբ։
«Պահարանից հայտնաբերել են դատարկ թղթապանակներ ու «Ազատ Արցախ» թերթը։ Գույքը վնասեցին, բայց նույնիսկ թերթը չառգրավեցին, թողեցին ու գնացին»,- նշել էր Երիցյանը՝ հավելելով, որ շենքում չկան և չի կարող լինել քրեական վարույթի համար հետաքրքրություն ներկայացնող որևէ նյութ։
Մեկ ամիս անց Aysor.am-ի հետ զրույցում Արցախի խորհրդարանի պատգամավոր Մետաքսե Հակոբյանը հայտնեց, որ գործով որևէ առաջընթաց չկա։
«Ոչ մի նորություն չկա։ Սա արդեն երկրորդ դեպքն է, որ իրենք գալիս ու կորում են, կարծես այդպիսի բան չէր էլ եղել։ Մի տեսակ արդեն օրինաչափ է դարձել, որ ժամանակ առ ժամանակ պարզապես շոու են անում»,- ասաց պատգամավորը։
Նրա խոսքով՝ խուզարկությունն ունի հստակ քաղաքական նպատակ։
«Ակնհայտ է, որ սա երկու լսարանի համար է։ Ադրբեջանին՝ ցույց տալու համար, թե տեսեք, մենք նրանց մշտապես ճնշումների տակ ենք պահում, ներքին լսարանին էլ փորձում են համոզել, թե այստեղ խաղաղասեր հայեր չեն, այլ ինչ-որ տեռորիստների խումբ է։ Սա ուղղակի ցուցադրության համար է»,- նշեց Հակոբյանը։
Պատգամավորը նաև հաստատեց, որ խուզարկության ընթացքում որևէ բան չի հայտնաբերվել։
«Իրականում իրենք ոչինչ էլ չգտան, որովհետև այնտեղ պարզապես ոչինչ չկար»։