Իշխանությունը այնքան տագնապած է, որ խոսում է քաղաքական դաշտում, ընդդիմադիր դաշտում մեծ դերակատարություն ունեցող ուժի՝ «Հայաստան» դաշինքի մասին և խոսում է այսպես կոչված իբր հրահանգավորման մասին։ Այս մասին այսօր՝ հունվարի 23–ին, ԱԺ–ում «ընտրական օրենսգրքում» փոփոխությունների նախագծի քննարկման ժամանակ հայտարարեց «Հայաստան» խմբակցության քարտուղար Արծվիկ Մինասյանը։
«Ակնհայտ է, որ հրահանգներով շարժվողը դուք եք, մեծամասնությունն է, և շարժվում է մեկ անձի հրահանգով և այն էլ բռնապետական մեծ հակումներ ունեցող անձի հրահանգով և այսօրվա նախագիծն էլ դրա վառ ապացույցներից մեկն է»,–ասաց նա։
Անդրադառնալով ՔՊ-ական պատգամավոր Արուսյակ Ջուլհակյանի ելույթին՝ Արծվիկ Մինասյանը նշեց. «Դուք կամայականորեն մեկնաբանեցիք Վենետիկի և ԺՀՄԻԳ–ի մոտեցումները, ընդ որում ասեմ, որ սրանք նաև Հայաստանի կողմից ընդունված միջազգային պարտավորությունների շրջանակում են։ Ձեր բերված օրինակը ընդամենը օրինակներից է, բայց ոչ ընտրական գործընթացի կարևորագույն տարրերից, որովհետև դիտորդների վերաբերյալ կարգավորումները համարվում են ընտրական օրենսդրության սկզբունքային կարգավորվող համակարգերից մեկը։
Բացի այդ, քիչ առաջ տեղի ունեցավ նաև խորհրդի նիստ, որտեղ ակնհայտ դարձավ, որ մեծամասնությունը անկախ ամեն ինչից, արհամարհելով բոլոր ժողովրդավարական նվազագույն կանոնները, իրավական նվազագույն պարտավորությունները, որոշել է «ուժի զոռով» ընդամենը մի քանի ամսից սպասվող ընտրություններում իրականացնել փոփոխություն»,– ասաց նա։
ԱԺ նախագահ Ալեն Սիմոնյանն էլ արձագանքեց. «Կարճ ասած ռեժիմը խուճապի մեջ է էլի»։
Ավելի ուշ իր ելույթում Արծվիկ Մինասյանը նաև նշեց. «Մենք անընդունելի ենք համարում նման վարքագիծը, սա հերթական փորձն է ընտրական կեղծիքները օրինականացնելուն միտված: Մենք հրավիրում ենք այս հարցի վերաբերյալ և միջազգային, և տեղական հասարակական կազմակերպությունների ուշադրությունը: Մենք մտադիր չենք մասնակցել հարցի քննարկմանը, «Հայաստան խմբակցությունը չի մասնակցելու»: