Հունվարի 23-ին, արտակարգ դեպք է տեղի ունեցել Արմավիրի մարզում։ Ժամը 09։00-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Արմավիրի բաժին է դիմել Արմավիրի մարզի բնակիչ 42-ամյա Արմենուհի Ա․-ն և հայտնել, որ նույն օրը ժամը 02։30-ի սահմաններում Զարթոնք գյուղի բնակիչներ 33-ամյա Նարեկ Հ․-ն և 29-ամյա Գոռ Հ․-ն, ոմն Զորոն և իրենց ընկերները, որոնց ինքը չի ճանաչում գնացել են Արմավիրի մարզի Տարոնիկ գյուղում գտնվող «7 հրաշալիք» գիշերային ակումբ։
Ինչպես հայտնում է ֆոտոլրագրող Գագիկ Շամշյանը, այցելուները այնտեղ պատվիրել են 35 հազար դրամի խմիչք, որից հետո Արմենուհի Ա․-ն պահանջել է հաշիվը, սակայն Զորոն իրեն տվել է կեղծ 20 հազար թղթադրամ։
Գ․ Շամշյանի տեղեկություններով Արմենուհի Ա․-ն հասկանալով, որը գումարը կեղծ է հետ է վերադարձրել այն ոմն Զորոյին ու նա հրաժարվել է այլ գումար տալ իրեն, ինչի շուրջ ծագել է վիճաբանություն, որի ժամանակ Նարեկ Հ․-ն, Զորոն և նրանց մեկ այլ ընկերը իր հասցեին հնչեցրել են սեռական բնույթի հայհոյանքներ, կոտրել ակումբի գույքի մեծ մասը և խմիչքները, ծեծի ենթարկել Արմենուհի Ա․-ին, որի ժամանակ վերջինիս բջջային հեռախոսը վայր է ընկել և Նարեկ Հ․-ն տեսնելով, որ հեռախոսը ընկել է գետնին վերցրել է այն և հեռացել են, պատճառելով իրեն մարմնական վնասվածք, նյութական և գույքային վնաս։
Դեպքի փաստով ոստիկանության Արմավիրի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Արմավիրի մարզային քննչական վարչության Վաղարշապատի քննչական բաժին։