Վերջին 4–5 օրերին Արարատյան դաշտում դիտվում է սառը օդի լճացում, որն ուղեկցվում է ցածր ջերմային ֆոնով, իսկ առանձին հատվածներում՝ նաև մառախուղով։ Այս մասին տեղեկացրել է «Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանը՝ նշելով, որ վաղը երեկոյան ժամերից Հայաստանին Միջերկրական ծովի շրջաններից կմոտենա հերթական ցիկլոնը, որը կմնա մինչև փետրվարի 4-ը։
«Ցիկլոնի ազդեցությամբ վաղը երեկոյան ժամերից սկսած հանրապետության առանձին շրջաններում սպասվում են տեղումներ՝ հիմնականում ձյան տեսքով։ Լեռնային առանձին գոտիներում կանխատեսվում է նաև քամու ուժգնացում՝ 17–20 մետր վայրկյան արագությամբ, բուք և ցածր հորիզոնական տեսանելիություն։
Միևնույն ժամանակ, քանի որ ցիկլոնը գալիս է Միջերկրական ծովից, այն հարավ-արևմուտքից իր հետ կբերի տաք օդային հոսանքներ։ Արդյունքում վաղը ցերեկային ժամերից սկսած մինչև փետրվարի 3-ը ներառյալ հանրապետության ողջ տարածքում, այդ թվում՝ Արարատյան դաշտում և Երևանում, օդի ջերմաստիճանը այս օրերի համեմատ կբարձրանա մոտ 7–8 աստիճանով։
Այսպիսով, չնայած սպասվող տեղումներին, Հայաստանում կգրանցվի օդի ջերմաստիճանի նկատելի բարձրացում, և սառը օդի լճացումը աստիճանաբար կվերանա»,- նշել է Սուրենյանը։