Ուկրաինայի նախագահ Վլադիմիր Զելենսկին մեկնաբանել է Ռուսաստանի առաջարկը՝ Վլադիմիր Պուտինի եւ իր հանդիպումն անցկացնել Մոսկվայում։
«Անշուշտ, անհնար է, որ ես հանդիպեմ Պուտինի հետ Մոսկվայում։ Դա նույնն է, թե Պուտինի հետ հանդիպես Կիեւում։ Ես նույնպես կարող եմ հրավիրել նրան Կիեւ, թող գա։ Հրապարակավ հրավիրում եմ նրան, եթե համարձակվի, իհարկե»,- ասել է Զելենսկին՝ պատասխանելով լրագրողների հարցերին, տեղեկացրել է «РБК-Украина»-ն։
Ուկրաինայի նախագահն ընդգծել է, որ պատրաստ է հանդիպման ցանկացած ձեւաչափի ղեկավարների մակարդակով, եթե այդ բանակցությունները կօգնեն ավարտել պատերազմը։
Սակայն, ասել է նա, նման հանդիպումն անցկացնել Մոսկվայում եւ Բելառուսում «պարզապես անհնար է, եւ լիովին հասկանալի է, թե ինչու. որովհետեւ դրանք պետություններ են, որոնցից մեկը ագրեսոր է, որն սկսել եւ վարում է պատերազմ մեր դեմ, սպանում է մեզ, իսկ մյուսը նրա գործընկերն է այդ գործողություններում»։
ՌԴ նախագահ Վլադիմիր Պուտինը 2025թ. աշնանը Զելենսկուն առաջարկել էր գալ Մոսկվա անձնական հանդիպման համար։ Այդ ժամանակ նույնպես Ուկրաինայի նախագահը հրաժարվել էր՝ հայտնելով, որՊուտինն ինքը կարող է Կիեւ գալ։
Եռակողմ բանակցություններից հետո, որոնք տեղի են ունեցել հունվարի 23-24-ին Աբու Դաբիում, այդ առաջարկով կրկին հանդես է եկել ՌԴ նախագահի օգնական Յուրի Ուշակովը։
Ալեքսանդր Լուկաշենկոն բազմիցս հայտնել է, որ Բելառուսը պատրաստ է բանակցություններ վարել Ռուսաստանի եւ Ուկրաինայի ղեկավարների միջեւ իր տարածքում։