Իրանին հասցվելիք ԱՄՆ հնարավոր հարվածի շուրջ ստեղծված իրավիճակը կքննարկվի երկուշաբթի օրը Թուրքիայի նախարարների կաբինետի կայանալիք նիստում՝ նախագահ Ռեջեփ Թայիփ Էրդողանի գլխավորությամբ։ Այս մասին «ՌԻԱ Նովոստի»-ին հայտնել է թուրքական դիվանագիտական աղբյուրը։
«Նախարարների կաբինետի նիստում կքննարկվեն Իրանին հարված հասցնելու ԱՄՆ սպառնալիքները, ինչպես նաև տարածաշրջանի վերջին իրադարձությունները։ Կրկին կընդգծվի Թուրքիայի դիրքորոշումը, որը դեմ է ռազմական միջամտությանը և պաշտպանում է դիվանագիտությունն ու երկխոսությունը»,- հայտնել է գործակալության զրուցակիցը։
Նրա խոսքով՝ այս համատեքստում նախարարները կքննարկեն Իրանի արտաքին գործերի նախարար Աբբաս Արաղչիի՝ շաբաթավերջին Ստամբուլ կատարած այցի, արտգործնախարար Հաքան Ֆիդանի և Թուրքիայի նախագահի հետ նրա հանդիպումների, ինչպես նաև Էրդողանի՝ ԱՄՆ-ի և Իրանի նախագահների հետ հեռախոսազրույցների արդյունքները։
Ավելի վաղ Axios պորտալը, հղում անելով իր աղբյուրներին, հայտնել է, որ Թուրքիան, Եգիպտոսը և Կատարը աշխատում են հաջորդ շաբաթ Անկարայում ԱՄՆ նախագահի հատուկ ներկայացուցիչ Սթիվ Ուիթքոֆի և Իրանի բարձրաստիճան ներկայացուցիչների հանդիպումը կազմակերպելու ուղղությամբ։ Թուրքական կողմը չի տիրապետում կոնկրետ տեղեկատվության՝ Ուիթքոֆի և Իրանի ներկայացուցիչների հնարավոր հանդիպման նախապատրաստման վերաբերյալ, «ՌԻԱ Նովոստի»-ին հայտնել է թուրքական մայրաքաղաքի աղբյուրը։