Ռուսաստանի և Ուկրաինայի միջև շարունակվող ռազմական գործողություններին մասնակցած Ադրբեջանի քաղաքացիները ենթարկվել են պատասխանատվության։ Այս մասին հայտնում է Trend-ը՝ հղում անելով Ադրբեջանի Պետական անվտանգության ծառայությանը:
Ինչպես հաղորդվում է, Պետական անվտանգության ծառայության կողմից իրականացվում են օպերատիվ-հետախուզական միջոցառումներ, որպեսզի հայտնաբերեն և իրավական պատասխանատվության ենթարկեն Ադրբեջանի Հանրապետության այն քաղաքացիներին, ովքեր մասնակցել են երկրի սահմաններից դուրս ընթացող ռազմական հակամարտություններին՝ Ադրբեջանի Հանրապետության օրենսդրությամբ չնախատեսված զինված կազմավորումների կազմում:
«Ստացված տեղեկատվության համաձայն՝ անցած ժամանակահատվածում Ադրբեջանի Հանրապետության զգալի թվով քաղաքացիներ մասնակցել են Ռուսաստանի և Ուկրաինայի միջև շարունակվող ռազմական գործողություններին, ինչի հետևանքով նրանցից շատերը զոհվել են, անհետ կորել կամ վիրավորվել, ինչպես նաև պարզվել է, որ ոմանք գտնվում են գերության մեջ», – ասված է ՊԱԾ հաղորդագրության մեջ:
Նշվում է, որ իրականացված հետաքննությունների ընթացքում ապացուցվել է մարտական գործողություններին Ադրբեջանի Հանրապետության քաղաքացիներ՝ 1991 թվականին ծնված Ռեալ Էլդենիզ օղլու Նաբիևի, 1993 թվականին ծնված Ֆարիս Ֆամիլ օղլու Հուսեյնովի, 1994 թվականին ծնված Ալի Էլնուր օղլու Մամեդովի և Մուրով Հասան օղլու Միրգաշիմլիի մասնակցությունը՝ Ռուսաստանի և Ուկրաինայի զինված կազմավորումների վերահսկողության ներքո, ինչի կապակցությամբ նշված անձինք ձերբակալվել և քրեական պատասխանատվության են ենթարկվել 2026 թվականի հունվարին, և նրանց նկատմամբ դատարանի որոշմամբ որպես խափանման միջոց է ընտրվել կալանավորումը: