Ուկրաինան արևմտյան գործընկերների հետ պայմանավորվածություն է ձեռք բերել, ըստ որի՝ Ռուսաստանի կողմից հրադադարի ապագա ցանկացած համաձայնագրի համակարգված խախտման դեպքում կհետևի Եվրոպայի և ԱՄՆ-ի համակարգված ռազմական պատասխանը: Հայտնում է Financial Times-ը, հղում անելով իր աղբյուրներին։
FT-ի տվյալներով՝ համապատասխան ծրագիրն ուկրաինացի, եվրոպացի և ամերիկացի պաշտոնյաները քննարկել են դեկտեմբեր և հունվար ամիսներին:
Ըստ պայմանավորվածությունների՝ Ռուսաստանի կողմից հրադադարի խախտումը կհանգեցնի պատասխան գործողությունների 24 ժամվա ընթացքում՝ սկսած դիվանագիտական նախազգուշացումից և ուկրաինական բանակի պատասխան գործողություններից: Եթե մարտական գործողությունները շարունակվեն, ուժի մեջ կմտնի պլանի երկրորդ փուլը, որը ենթադրում է «ցանկացողների կոալիցիայի» ուժերի կիրառում. դրա մեջ, ի թիվս այլոց, մտնում են Եվրամիության երկրները, Մեծ Բրիտանիան, Նորվեգիան, Իսլանդիան և Թուրքիան:
Եթե հրադադարի ռեժիմի խախտումը վերածվի ավելի լայնամասշտաբ հարձակման, ապա 72 ժամ անց կհետևի Արևմուտքի կողմից աջակցվող ուժերի համակարգված ռազմական պատասխանը՝ ամերիկյան զինվորականների մասնակցությամբ։
FT-ն նշում է, որ վճռորոշ նշանակություն կունենա հրադադարի ռեժիմի պահպանման մոնիթորինգը։ Հրապարակման մեջ ասվում է, որ ԱՄՆ-ն առաջարկել է բարձրտեխնոլոգիական հսկողության միջոցներ տրամադրել՝ 1400 կիլոմետր երկարությամբ ռազմաճակատի գծի երկայնքով։
Հունվարի սկզբին Փարիզում տեղի է ունեցել «ցանկացողների կոալիցիայի» անդամ երկրների, Ուկրաինայի և ԱՄՆ ներկայացուցիչների հանդիպումը։ Դրա արդյունքներով Ֆրանսիայի նախագահ Էմանուել Մակրոնը հայտարարել է, որ կողմերը համաձայնեցրել են Ուկրաինայի անվտանգության երաշխիքների մասին հռչակագիրը։ Բացի այդ, Մակրոնը, Ուկրաինայի նախագահ Վլադիմիր Զելենսկին և Մեծ Բրիտանիայի վարչապետ Քիր Սթարմերը ստորագրել են հռչակագիր՝ պատերազմի ավարտից հետո Ուկրաինայի տարածքում «բազմազգ ուժեր» տեղակայելու ծրագրերի մասին։ Ենթադրվում է, որ այդ զորքերը կգործեն որպես ուժեր, որոնք կապահովեն անվտանգության երաշխիքները և Ուկրաինայի՝ խաղաղությանն ու կայունությանը վերադառնալու կարողությունը։