Այս օրերին «Միասնության թևեր» քաղաքական նախաձեռնության ղեկավար Արման Թաթոյանը Եվրոպայում և Միացյալ Նահանգներում անցկացնում է կարևոր հանդիպումներ։
Մասնավորապես, Փարիզում նախատեսված են նշանակալի հանդիպումներ, որից հետո՝ օվկիանոսից այն կողմ՝ ԱՄՆ-ում, նախատեսվում են հանդիպումներ և դասախոսություններ Ամերիկայի և աշխարհի առաջատար համալսարաններում՝ Յեյլում, Կոլումբիայի համալսարանում, այդ թվում` Փենսիլվանիայի համալսարանում, որտեղ սովորել է Արման Թաթոյանը և համալսարանի կողմից ճանաչվել իրավունքի դպրոցի լավագույն շրջանավարտներից։
Դասախոսությունների թեմաներն են միջազգային իրավունքը, պատերազմական հանցանքների համար պատասխանատվությունը և մարդու իրավունքների պաշտպանությունը։
«Հենց այս մասին էի գրել իմ վերջին նամակում ԱՄՆ փոխնախագահ Ջ.Վենսին։ Ադրբեջանի կողմից Հայաստանի և Արցախի նկատմամբ հանցանքների, օկուպացված տարածքների, բռնի տեղահանվածների, բռնությամբ անհետացածների, մեր գերիների և պատանդների ճակատագրի մասին, որոնց անհրաժեշտ է վերադարձնել հայրենիք։
Այսօր, երբ Հայաստանի իշխանությունները ամեն գնով փորձում են թաքցնել առկա խնդիրները և ձևացնել, թե դրանք գոյություն չունեն, մեզ խիստ անհրաժեշտ է միջազգային հրապարակայնություն։
Որպես մարդ, ով ամբողջ կյանքում զբաղվել է մարդու իրավունքների պաշտպանությամբ, ես չեմ կարող և չեմ լռելու»,– գրել է Արման Թաթոյանը։
Պարբերաբար ձեզ կտեղեկացնենք այս աշխատանքի ընթացքի և արդյունքների մասին: