Եվրոպական անվտանգության ծառայությունները կասկածում են ռուսական «Լուչ-1» և «Լուչ-2» տիեզերանավերի նկատմամբ ռադիոէլեկտրոնային հետախուզություն իրականացնելու և Եվրոպան սպասարկող մի քանի արբանյակների հաղորդակցությունները որսալու մեջ։ Այս մասին գրում է Financial Times-ը՝ հղում անելով զինված ուժերի ներկայացուցիչներին։
Մի քանի տարի շարունակ Արևմուտքի ռազմական և քաղաքացիական տիեզերական գործակալությունները հետևել են «Լուչ-1»-ի և «Լուչ-2»-ի գործունեությանը, որոնք ուղեծրում իրականացրել են «բազմաթիվ կասկածելի մանևրներ»։ Ըստ FT-ի զրուցակիցների՝ երկու ռուսական սարքերն էլ վտանգավոր չափով մոտեցել են եվրոպական կարևորագույն արբանյակներին, որոնք սպասարկում են ողջ մայրցամաքը, ներառյալ Մեծ Բրիտանիան, ինչպես նաև Աֆրիկայի և Մերձավոր Արևելքի զգալի հատվածները։
Ըստ ուղեծրային տվյալների և վերգետնյա դիտարկումների՝ ռուսական սարքերը եվրոպական արբանյակների հարևանությամբ մնացել են «շաբաթներով»։ 2023 թվականին արձակվելուց ի վեր «Լուչ-2»-ը մոտեցել է եվրոպական 17 արբանյակների։
FT-ի զրուցակիցները մտահոգություն ունեն, որ այս մանևրները կարող են Մոսկվային թույլ տալ մանիպուլյացիայի ենթարկել արբանյակների հետագծերը կամ նույնիսկ դրանց բախում հրահրել։ «Երկու [ռուսական] արբանյակներն էլ կասկածվում են ռադիոէլեկտրոնային հետախուզություն իրականացնելու մեջ», — ասել է Գերմանիայի զինված ուժերի տիեզերական հրամանատարության ղեկավար Միխայել Տրաուտը։
Եվրոպական հետախուզության բարձրաստիճան պաշտոնյան լրագրողների հետ զրույցում անհանգստություն է հայտնել, որ գաղտնի տեղեկատվությունը, մասնավորապես՝ արբանյակների կառավարման հրահանգները, ծածկագրված չեն, քանի որ դրանց մեծ մասն արձակվել է տարիներ առաջ՝ առանց վերջին սերնդի ծածկագրման համակարգերի։ Սա նրանց խոցելի է դարձնում միջամտությունների համար, հավելել է նա։
Այն արբանյակները, որոնց մոտեցել են «Լուչ-1»-ը և «Լուչ-2»-ը, հիմնականում օգտագործվում են քաղաքացիական նպատակներով (օրինակ՝ արբանյակային հեռուստատեսության համար), սակայն փոխանցում են նաև որոշակի կառավարական կամ ռազմական հաղորդագրություններ։
Թեև հենց «Լուչերը» դժվար թե կարողանան խլացնել կամ ոչնչացնել արբանյակները, դրանք, հավանաբար, Ռուսաստանին տրամադրել են հսկայական ծավալի տվյալներ այն մասին, թե ինչպես կարելի է նման համակարգերը շարքից հանել, գրում է FT-ն։