ԱՄՆ փոխնախագահ Ջեյ Դի Վենսը տարածաշրջանային այցի շրջանակներում ժամանել է Հայաստան։
Կառավարությունից այս կապակցությամբ տեղեկացնում են, որ այսօր երեկոյան Նիկոլ Փաշինյանը և Ջեյ Դի Վենսը համատեղ մամուլիս ասուլիսով և հայտարարություններով հանդես կգան։
Oragir.News-ը՝ որպես Կառավարությունում հավատարմագրված լրատվամիջոց, ցանկացավ ներկա գտնվել ասուլիսին, սակայն մեզ նման հնարավորություն չընձեռնվեց։ Կառավարության Տեղեկատվության և հասարակայնության հետ կապերի վարչության պետ Արմեն Խաչատրյանը մեզ հետ զրույցում տեղեկացրեց, որ տեղերը խիստ սահմանափակ են, հետևաբար՝ մեր լրագրողը չի կարող մասնակցել։ «Ուղիղ եթեր ենք ապահովելու, կարող եք այդտեղից վերցնել»,- ասաց նա։
Դիտարկմանը, որ Oragir.News-ը Կառավարությունում հավատարմագրված լրատվամիջոց է և ցանկանում է անպայման ներկա գտնվել այդ ասուլիսին՝ Արմեն Խաչատրյանը նշեց, որ գործադիրում հավատարմագրված ավելի քան 50 լրատվամիջոց կա, սակայն տեղերը սահմանափակ են, և բոլոր լրատվամիջոցները չեն կարող ներկա գտնվել։
Ճշտող հարցին՝ ի՞նչ սկզբունքով են ընտրվել այն լրատվամիջոցները, որոնց թույլատրվել է մասնակցել՝ պաշտոնյան արձագանքեց․ «Որ սկզբունքով որ ընտրվել են»։
Այսպիսով՝ Փաշինյան-Վենս ասուլիսը ոչ բոլոր լրատվամիջոցների համար է հասանելի։ Սա Փաշինյանի Կառավարության հերթական խայտառակ որոշումն է, որը կայացվել է անհարմար հարցերից խուսափելու համար, որոնք գուցե որոշակի ազդեցություն ունենային Հայաստանում ժողովրդավարության մակարդակի վերաբերյալ ԱՄՆ փոխնախագահի ունեցած պատկերացումների վրա։ Հակառակ դեպքում Կառավարության շենքում հնարավոր կլիներ գտնել մի դահլիճ, որտեղ գործադիրում հավատարմագրված 5 տասնյակ լրատվամիջոցների ներկայացուցիչները կտեղավորվեին ու Նիկոլ Փաշինյանին և Ջեյ Դի Վենսին հարցեր ուղղելու հնարավորություններ կունենային։
Եթե այս հրապարակումից հետո այս խայտառակ որոշումը վերանայնի և «խիստ սահմանափակ» տեղերն ընդլայնվեն, Oragir.News-ը պատրաստ է ներկա գտնվել ասուլիսին։