Թեհրանն ակնկալում է, որ Երևանն ու Բաքուն որոշումներ կայացնելիս հաշվի կառնեն իր դիրքորոշումը։ Այս մասին մամուլի ասուլիսի ժամանակ հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային՝ պատասխանելով տարածաշրջան ԱՄՆ փոխնախագահի այցի մասին հարցին։
Բաղային նշել է, որ Իրանն իր դիրքորոշումը ժամանակին հասցնում է Հայաստանի և Ադրբեջանի ուշադրությանը՝ անկախ նրանից, թե ով և երբ է այցելում այդ երկրներ։
Իրանցի դիվանագետի խոսքով՝ Թեհրանն աջակցում է հարևան երկրների միջև կապերի և տրանսպորտային հաղորդակցությունների զարգացմանը, սակայն միևնույն ժամանակ անընդունելի է համարում ցանկացած նախաձեռնություն, որը կարող է վտանգել տարածաշրջանի սահմանները։ Բաղային ընդգծել է, որ նման նախաձեռնությունները չեն նպաստում տարածաշրջանային անվտանգության ամրապնդմանը։
«Երկու հարևան պետություններն էլ տեղյակ են այս հարցերի վերաբերյալ Իրանի մոտեցումների և մտահոգությունների մասին։ Մենք ակնկալում ենք, որ ցանկացած որոշում կայացնելիս այդ նկատառումները պատշաճ կերպով հաշվի կառնվեն»,- ասել է նա։
Հիշեցնենք, որ ԱՄՆ փոխնախագահ Ջեյ Դի Վենսի՝ Հայաստան այցի առանցքային թեմաներից մեկը «Թրամփի ուղին» էր։ Կողմերը վերահաստատել են, որ այս ծրագիրը, խաղաղության հաստատման լուրջ օգուտներից բացի, նաև տարածաշրջանային և գլոբալ նշանակություն կունենա ՝ Արևմուտքից Արևելք անխոչընդոտ հաղորդակցությունների զարգացման միջոցով։
«Թրամփի ուղի՝ հանուն միջազգային խաղաղության և բարօրության» (TRIPP) նախագիծը ենթադրում է 43 կիլոմետրանոց երկաթգծի կառուցում, որն առաջին փուլում պետք է կապի Ադրբեջանն ու Նախիջևանը, իսկ հեռանկարում՝ ինտեգրվի «Հյուսիս-Հարավ» և «Արևելք-Արևմուտք» միջանցքներին։
Այն նախատեսում է ընկերության ստեղծում ԱՄՆ վերահսկիչ բաժնեմասով, իսկ Հայաստանը վերահսկողության մեխանիզմներ կունենա վերահսկողական մեխանիզմներ սկզբունքային հարցերի վերաբերյալ։ Առաջին փուլում ԱՄՆ-ին առաջարկվում է 74% բաժնեմաս, Հայաստանին՝ 26% (համաձայնագրի երկարաձգման դեպքում բաժնեմասը մինչև 49% հասցնելու հնարավորությամբ)։