ՆԱՏՕ-ում Ուկրաինայի դիվանագիտական առաքելության ղեկավար Օլենա Գետմանչուկը թվարկել է այն երկրները, որոնք Ուկրաինային ամենամեծ օգնությունն են ցուցաբերել խիստ անհրաժեշտ ամերիկյան զենքի, այդ թվում՝ PURL մեխանիզմի միջոցով ներդրվող ՀՕՊ համակարգերի ձեռքբերման գործում։
Այս մասին նա հայտարարել է Բրյուսելում լրագրողների հետ հանդիպման ժամանակ՝ ՆԱՏՕ-ի նախարարական հանդիպման նախաշեմին, որին հրավիրված է նաև Ուկրաինան, հայտնում է «Եվրոպեյսկայա պրավդան»։
Դեսպանը հաստատել է, որ ՆԱՏՕ-ի անդամ երկրների միջև Ուկրաինային տրամադրվող օգնության բաշխումը անհավասար է և կան մի քանի առաջատար պետություններ, որոնք ծածկում են ծախսերի անհամաչափ մեծ մասը։
«PURL-ում ներդրումների գծով առաջատարը Նորվեգիան է։ Համար երկու դոնորը Նիդերլանդներն են, համար երեքը՝ Գերմանիան։ Կան այլ երեք երկրներ, որոնք շատ մոտ են՝ Կանադան, Շվեդիան և Դանիան»,- պատմել է նա։
Ըստ Գետմանչուկի՝ այս առաջատար պետությունները բարձրացնում են միջոցների արդարացի բաշխման հարցը և դա խնդիր է ծրագրի ֆինանսավորման մեջ։ Այդուհանդերձ, նրանք պատրաստ են նաև հետագայում աջակցել Ուկրաինային։
«Այս թոփ 6-ը PURL-ի ֆինանսավորման փաստացի հիմնասյուներն են։ Կան նաև այլ երկրներ, որոնք նույնպես զգալի ներդրումներ են կատարել։ Այս բոլոր երկրները քաջ գիտակցում են, որ չաջակցելով PURL-ին, նրանք կպատժեն բացառապես Ուկրաինային, ծայրահեղ ցածր ջերմաստիճանի և սարսափելի գնդակոծությունների պայմաններում ապրող ուկրաինացիներին, ինչպես նաև ռազմաճակատը պահող ուկրաինացի զինվորականներին»,- պարզաբանել է դիվանագետը։
Ինչպես հաղորդվում էր, ՆԱՏՕ-ի պետությունները, չնայած Գրենլանդիայի հետ կապված խնդիրներին, պատրաստ են ֆինանսավորել Ուկրաինայի զինված ուժերի համար ամերիկյան զենքի գնումը։
Միևնույն ժամանակ, արդեն այս շաբաթ Ուկրաինայի զինված ուժերի համար ամերիկյան զենքի գնման գործընթացին պետք է միանան նոր երկրներ։
Հայտնի է նաև, որ ՆԱՏՕ-ում լիովին վերանայել են իրենց դերը Ուկրաինային օգնության հարցում և այժմ Ուկրաինայի զինված ուժերի զենքի 80%-ը գալիս է Դաշինքի միջոցով։