Փետրվարի 12-ի գիշերը ռուսական բանակը բալիստիկ հրթիռներով և հարվածային անօդաչու սարքերով հարձակվել է Ուկրաինայի վրա: Հարվածի տակ է հայտնվել Կիևը, որտեղ թիրախավորվել են ենթակառուցվածքային օբյեկտները, հայտնել է Ուկրաինայի մայրաքաղաքի քաղաքապետ Վիտալի Կլիչկոն: Հրթիռի բեկորների ընկնելու հետևանքով մասնավոր տուն է վնասվել Դարնիցկի թաղամասում, ինչպես նաև ոչ բնակելի շենքեր Գոլոսեևսկի և Դեսնյանսկի թաղամասերում: Դնեպրովսկի թաղամասում բեկորներն ընկել են բնակելի բազմահարկ շենքի մոտ: Կիևի ռազմական վարչակազմի պետ Տիմուր Տկաչենկոյի տվյալներով՝ հարձակման հետևանքով տուժել է երկու մարդ:
Ռուսական բանակը բալիստիկ հրթիռներով հարվածներ է հասցրել նաև Դնեպրոպետրովսկի մարզի Դնեպր և Պավլոգրադ քաղաքներին։ Դնեպրի թաղամասերից մեկում վնասվել են մասնավոր տներ և մեքենաներ, հայտնել է մարզային ռազմական վարչակազմի պետ Ալեքսանդր Գանժան։ Նրա տվյալներով՝ վիրավորվել են նորածին երեխա և 4-ամյա աղջիկ։ «Երեխաներին ցուցաբերվում է անհրաժեշտ ողջ բժշկական օգնությունը», — հավելել է Գանժան։ Նույն գիշերը Ռուսաստանը «Շահեդ» տեսակի հարվածային անօդաչու սարքերով հարձակվել է Օդեսայի վրա։ «Թաղամասերից մեկում վնասվել է ենթակառուցվածքային օբյեկտ։ Բացի այդ, վնասներ է կրել նաև բիզնես կենտրոնը», — հայտնել է քաղաքային ռազմական վարչակազմի պետ Սերգեյ Լիսակը։ Տուժել է մեկ մարդ։
Նախօրեին՝ փետրվարի 11-ին, ռուսական բանակը անօդաչու սարքերով հարվածել է Խարկովի մարզի Բոգոդուխով քաղաքին և Զապորոժիեին։ Բոգոդուխովում անօդաչու սարքը հարվածել է մասնավոր տանը. զոհվել են 34-ամյա տղամարդ և երեք երեխա։ Տուժել են նաև հղի կինը և քաղաքի 74-ամյա բնակչուհին։ Զապորոժիեում քաղաքի երկու թաղամասերում ավելի քան 11 հազար բաժանորդ մնացել է առանց էլեկտրականության։