Ադրբեջանական բանակը որևէ պարագայում ինքնակամ Հայաստանի Հանրապետության օկուպացված հատվածներից դուրս չի գալու։ Նման պատրանքների տրվել չի կարելի, նման պատրանքները շատ վտանգավոր են։ Այս մասին «Փաստինֆո»-ի հետ զրույցում ասաց ռազմական փորձագետ Դավիթ Ջամալյանը՝ անդրադառնալով Նիկոլ Փաշինյանի հայտարարությանը, թե սահմանազատման արդյունքում ադրբեջանցիները դուրս կգան ՀՀ տարածքներից, և միաժամանակ շտապել նշել, որ սահմանազատման աշխատանքները կարող են շատ երկար տևել։
«Ավելին, այն պնդմամբ, որ սահմանազատման աշխատանքները տարիներ են տևելու, Փաշինյանը հող է նախապատրաստում ապագա զիջումների համար, որոնք անխուսափելի են լինելու սահմանազատման անվան տակ։ Այս կերպ նա փորձում է հանրային ընկալումներում արմատավորել այն, որ մարդիկ համակերպվեն նաև ապագայում կատարվելիք զիջումներին, որոնք Փաշինյանի իշխանության վերարտադրվելու դեպքում հաստատապես լինելու են։
Ես առավել քան վստահ եմ, որ Նիկոլ Փաշինյանի վերարտադրության պարագայում Հայաստանի Հանրապետություն–Ադրբեջան պետական սահմանը անցնելու է հենց այն հատվածով, որտեղ թշնամին կանգնած է։ Այսինքն՝ այդ օկուպացված հատվածները Ադրբեջանը կուլ է տալու և ի վերջո հասնելու է նրան, որ միավորի իր պետության կազմի հետ։
Վստահ եմ, որ Նիկոլ Փաշինյանի վերարտադրման դեպքում, որոշ ժամանակ անց, հերթական պատերազմն ու աղետն է լինելու մեր տարածաշրջանում, և ադրբեջանական բանակը Թուրքիայի հետ՝ Արևմուտքի լուռ համաձայնությամբ ու աջակցությամբ, տարածքներ է վերցնելու Սյունիքից ու Վայոց ձորից»։
Նա նաև հիշեցրեց Իրանի Իսլամական հեղափոխության պահապանների հետ ասոցացվող Telegram ալիքի հայտարարությանը, թե Վենսի այցով տարածաշրջան նոր և արյունահեղ պատերազմի հիմք դրվեց։ «Միացյալ Նահանգները տարածաշրջանում հակաիրանական պլացդարմ է ստեղծում, և այստեղ մեզ վերապահված է ամենաստորին՝ ոչինչ չնշանակող դերակատարությունը, մեզ ընդամենը որպես տարածք են օգտագործելու, ոչ ավելին, իսկ, օրինակ, Ադրբեջանի հետ ավելի ծավալուն հեռանկարներ կան՝ հաշվի առնելով համագործակցության ծավալները։
Անխուսափելիորեն հերթական հակաիրանական զարգացումների տրամաբանության մեջ Ալիևը հնարավորություն կգտնի Սյունիքին հարվածելու և իրականացնելու իր նկրտումներն ու ամբիցիաները հակաիրանական սխեմայի կոնտեքստում»,- ասաց նա՝ ընդգծելով, որ համոզված է, որ Նիկոլ Փաշինյանի իշխանության վերարտադրության պարագայում այս սցենարն անխուսափելի է։
Նա նաև ընդգծեց, որ եթե անգամ հիմա սահմանին անդորր է, այդ անդորրը հենց նրա համար է, որպեսզի Փաշինյանը կարողանա վերարտադրվել։ «Հենց այդ հարցը լուծվեց իրենց համար ցանկալի ձևով, սկսվելու են նորանոր պահանջներ և նորանոր զիջումներ»։