Ուկրաինայի նախագահ Վլադիմիր Զելենսկին հայտարարել է, որ իր երկիրը չի պարտվում Ռուսաստանի հետ պատերազմում, եւ ինքը չի ստիպի իր ժողովրդին խաղաղության մասին «վատ համաձայնագիր» կնքել։ Այս մասին նա ասել է The Atlantic-ի լրագրող Սայմոն Շուստերի հարցազրույցում։
Լրագրողի խոսքով՝ Զելենսկին հանդիպման ժամանակ մի քանի անգամ ասել է, որ չի ընդունի խաղաղության համաձայնագիր նվաստացուցիչ պայմաններով։ «Մենք շտապում ենք վերջ դնել պատերազմին»,- ասել է նա՝ ընդգծելով, որ դա նույնը չէ, որ շտապ համաձայնագիր կնքվի՝ անկախ պայմաններից։ Ուկրաինայի նախագահը նաեւ նշել է, որ կգերադասի առհասարակ համաձայնագիր չկնքել, քան ստիպել երկրի բնակիչներին ընդունել այն ոչ շահեկան պայմաններով։
«Ուկրաինան չի պարտվում»,- ասել է Զելենսկին՝ ի պատասխան ճակատում իրավիճակը գնահատելու մասին Շուստերի խնդրանքի։ Անգամ ինտենսիվ մարտական գործողություններից չորս տարի հետո, ասել է Ուկրաինայի նախագահը, ինքը պատրաստ է շարունակել մարտնչել, եթե դա անհրաժեշտ է արժանապատիվ եւ ամուր խաղաղության ապահովման համար։
Զելենսկու կարծիքով՝ ԱՄՆ նախագահ Դոնալդ Թրամփը ընտրել է այլ մոտեցում ռուս-ուկրաինական պատերազմն ավարտելու հարցում։ «Ես կարծում եմ, որ Թրամփի համար չկա ավելի մեծ հաղթանակ, քան Ռուսաստանի եւ Ուկրաինայի միջեւ պատերազմը դադարեցնելը։ Նրա ժառանգության համար սա առաջնահերթ խնդիր է»,- հարցազրույցում ասել է Ուկրաինայի նախագահը։
Պատերազմի ավարտը կարող է օգնել նաեւ հանրապետականներին 2026թ․ նոյեմբերին կայանալիք ԱՄՆ Կոնգրեսի ընտրություններում, կարծում է Զելենսկին։ «Թրամփի համար ամենաարդյունավետ իրավիճակը միջանկյալ ընտրություններից առաջ դա անելն է [պատերազմը դադարեցնելը]։ Այո, նա ուզում է ավելի քիչ մահեր։ Բայց լուրջ ասած՝ սա պարզապես նրա համար հաղթանակ է, քաղաքական հաղթանակ»,- ավելացրել է նա։
Զելենսկու կարծիքով՝ Մոսկվան կարող է օգտագործել այդ ժամանակը պատերազմը դադարեցնելու համար, քանի դեռ Թրամփի ուշադրությունը չի շեղվել ԱՄՆ ընտրություններից, եւ քանի դեռ դա «կարեւոր եւ արժեքավոր» է իր համար։
Ուկրաինայի նախագահն ինքը՝ ռիսկի դիմելով կորցնել Թրամփի՝ որպես միջնորդի ուշադրությունը, կպնդի իր հիմնական պահանջը. խաղաղության առաջին քայլը պետք է լինի ԱՄՆ եւ Եվրոպայի երաշխիքներն ստանալը, որ հրադադարից հետո նրանք կպաշտպանեն Ուկրաինան Ռուսաստանի ցանկացած ապագա հարձակումից։