Վեհարանի մասով ուզում եմ հասկանալ հայտարարություններ, որոնք հնչում են մեր կողմից, ակնկալում ենք նաև պատասխան իրենց կողմից։ Այս մասին ԱԺ ճեպազրույցում ասել է ՔՊ-ական պատգամավոր Արուսյակ Մանավազյանը՝ անդրադառնալով հարցին, թե ի՞նչ փաստեր կան, որ ցանկանում են ՀՀ-ից Մայր Աթոռի գանձերը դուրս բերել։
Մանավազյանը հարցրեց, թե արդյոք լրագրողները փորձե՞լ եք կաթողիկոսին հարցեր ուղղել ու պատասխաններն ակնկալել։ «Որովհետև, անդադար այնպիսի տպավորություն է, որ մենք հնչեցնում ենք մտքեր, արտահայտում ենք մտահոգություններ եկեղեցու հանդեպ, և այն, ինչ տեղի է ունենում եկեղեցու շուրջ այդ մտահոգություններից, չկա գեթ մեկ արձագանք։
Իմ մտահոգությունն այն է, որ մենք անդադար պատասխանում ենք ձեր հնչեցրած հարցերին, բայց արդյո՞ք այդ տվյալ անձնավորությունը երբևէ պատրաստակամություն հայտնելը պատասխանե՞լ հանրության կողմից հնչեցված և մտահոգիչ հարցերին իր անձի և իր շուրջ»։
Դիտարկմանը, թե երբ մեղադրանքներ են հնչեցնում, ինչու՞ փաստեր չեն ներկայացնում՝ նույն խմբակցության քարտուղար Արթուր Հովհաննիսյանը պատասխանեց, որ վարչապետի արած որևէ հայտարարություն չի կարող իր տակ չունենալ հիմնավորումներ։
«Եթե մեր կողմից հնչել է հայտարարություն, որ վեհարանի հոգևոր բարձրաստիճան ներկայացուցիչների մի շրջանակ փորձում է կաթողիկոսությունը տեղափոխի Հայաստանի Հանրապետությունից, Էջմիածնի գանձերն էլ հետը, ուրեմն մենք դրա վերաբերյալ ունենք շատ հիմնավոր տեղեկություններ, այդ տեղեկություններ արդյո՞ք այնքան են հասունացել, որ պետք է վերածեն քրեական գործի կամ իրավական հետապնդման, այդ հարցի պատասխանը ես այս պահին չունեմ, այդ հարցի պատասխանը մենք բոլորս կստանանք, երբ որ իրականության մեջ նման բան տեղի կունենա։ Բայց կան հիմնավորումներ, այն էլ ինչ հիմնավորումներ կան և դրա մասին պատեհ պահին բոլորդ կիմանաք։ Մենք ելնում ենք Հայաստանի Հանրապետության պետական անվտանգության, պետական անվտանգությունից, Հայաստանի Հանրապետության շահից»,-ասաց նա։
5