44–օրյա պատերազմի հարցով ԱԺ քննիչ հանձնաժողովի նախագահ Անդրանիկ Քոչարյանը ասում էր, ոչ թե քննիչ հանձնաժողովի զեկույցին ծանոթանամ, այլ կարող եմ ծանոթանալ միայն այն արձանագրություններին, որտեղ ես ելույթ եմ ունեցել և փակ, և բաց նիստին. զեկույցի վերաբերյալ ինքը չի խոսել։ Այս մասին, այսօր՝ փետրվարի 18–ին, լրագրողների հետ զրույցում նշեց ՀՀ պաշտպանության նախկին նախարար Դավիթ Տոնոյանը։
«Բայց ես նաև իրավունք ունեմ Ազգային ժողովի կանոնակարգ օրենքով ծանոթանալու զեկույցին։ Ես ևս մեկ անգամ դիմել եմ, և որևիցե պատասխան չունեմ դեռևս։
Զեկույցը պատրաստված է, բայց զեկույցը չունի այն կարգավիճակը, որը ըստ Ազգային ժողովի աշխատակազմի ղեկավարի, պետք է հնարավորություն տա, որ ես ծանոթանամ դրան»,–ասաց նա։
Հարցին՝ եթե զեկույցը հրապարակվի, հնարավո՞ր է, որ, օրինակ, Նիկոլ Փաշինյանը շատ վատ դրության մեջ հայտնվի, և դրանով է պայմանավորված, որ հանրությունից փորձում են թաքցնել զեկույցը, Դավիթ Տոնոյանը պատասխանեց. «Ես չգիտեմ, ով կարող է ինչ իրադրության մեջ հայտնվել։ Խնդիրն այն է, թե արդյոք ճիշտ բովանդակություն ունի այդ զեկույցը, որը հիմնված է լինելու նաև իմ պատասխանների վրա։ Իմ խնդիրն է հասկանալ, թե պատասխանները ճիշտ են ձևակերպված, ճիշտ ընկալումների են եկել և նաև չլինեն միջազգային լուրջ խնդիրներ դրանից հետո»։