Աջափնյակում երկու օր առաջ տեղի ունեցած արյունալի կրակոցների գործով նոր մանրամասներ են հայտնի դարձել։
Ըստ տեղեկությունների՝ Աջափնյակի կրակոցների գործով իրավապահները գործող անձանց ողջ շրջանակը հայտնաբերելու համար ոտքի են հանել հանրապետության ոստիկանության գրեթե բոլոր ստորաբաժանումները` նրանց գտնվելու վայրը հայտնաբերելու համար։
Նույն տեղեկություններով, այդ անձանց հետ կապվող նույնիսկ հեռու հարազատների, անծանոթների բնակարաններ են այցելում։
Ի դեպ, որոնվող քաղաքացիների մեջ, մեր տեղեկություններով, կա 2 եղբայր։
Ավելի վաղ հայտնել էինք, որ փետրվարի 18-ին, մարտաֆիլմ հիշեցնող կրակոցներ են հնչել Աջափնյակ թաղամասի Աբելյան փողոցի 9 հասցեում. կան վիրավորներ։ Համացանցում տեսանյութ է տարածվել, որտեղ երևում են, թե ինչպես են մի խումբ անձինք կրակում միմյանց վրա։
Նշված վայրից հրազենային վնասվածքներով 10 քաղաքացիներ տեղափոխվել են Երևանի տարբեր հիվանդանոցներ։ Դեպքի վայրում հայտնաբերվել են ինքնաձիգից և ատրճանակից կրակված մի քանի պարկուճներ, արնանման հետքեր, դանակ, «Lexus» մակնիշի ավտոմեքենա, որի վրա առկա են կրակոցի հետքեր։
Վիրավորներից մեկը հիվանդանոցում մահացել է, վիրավորներից երեքի վիճակը ծայրահեղ ծանր է, երեքինը՝ ծանր։