«Առողջապահական համայնքի ներկայացուցիչներն ակնկալում են կառուցողական քննարկում, անցած երկու ամսվա ընթացքում ի հայտ եկած խնդիրների գույքագրում, դրանց վերլուծություն, արդյունքների հիման վրա շտկումներ, լուծումների առաջարկում»,-ԱԺ նախագահին ու խորհրդարանական խմբակցություններին հասցեագրված առողջության համպարփակ պարտադիր ապահովագրության բացերի և ռիսկերի վերաբերյալ խորհրդարանական լսումներ կազմակերպելու դիմումներն ԱԺ ընդունարան հանձնելուց հետո լրագրողների հետ զրույցում ասաց «Առողջության իրավունք» ՀԿ նախագահ Անուշ Պողոսյանը։
Նրա խոսքով, այդ ամենը շատ կարևոր է, քանի որ եթե ռեֆորմը ձախողվի, ապա այն լուրջ խնդիր կլինի երկրի սոցիալ-տնտեսական ոլորտում;
«Մենք գիտենք, որ գրպանից ծախսերը բերում են բնակիչների աղքատացմանը, բնակիչները մեծ հույսեր են կապաում այս համակարգի հետ։ Երբ մենք նայում ենք նախարարի այցերը բուժհաստատություններ, լսում ենք նրա հայտարարությունները, մեզ թվում է, որ ունենք սինգապուրյան առողջապահություն, մինչդեռ մարդիկ հիվանդանոցներում բախվում են շատ լուրջ խնդիրների»,-ասաց Ա. Պողոսյանը։
Նրա խոսքով, բացի այդ խնդիրներ են ունեցել բուժաշխատողները, դեղատները, բժիշկներին վճարել են ուշ, դեղատներին փոխանցել ուշ։