Թուրքիայի նախագահ Ռեջեփ Թայիփ Էրդողանը Լոնդոնում հանդիպել է Մեծ Բրիտանիայում ապրող թուրք հայրենակիցների հետ: Այս մասին տեղեկացնում է «Հուրրիյեթ» պարբերականը:
«Այսօր Թուրքիան մի երկիր է, որն առանց որևէ մեկի ուղղությամբ նայելու իրականացնում է գործողություններ՝ իր ազգային անվտանգությունն ապահովելու նպատակով, և վարում է անկախ արտաքին քաղաքականություն: Մենք հավակնություններ չունենք Սիրիայի հողերի նկատմամբ, բայց նրանք, ովքեր ունեն այդպիսի հավակնություններ, թող լքեն այդ երկիրը»,- նշել է Էրդողանը:
Հիշեցնենք, որ հոկտեմբերի 22-ին Սոչիում Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի հանդիպման արդյունքում կնքվել է հուշագիր, որի 5-րդ կետում նշվում է, որ սկսած հոկտեմբերի 23-ի ժամը 12:00-ից թուրք-սիրիական սահմանի սիրիական կողմում, որը դուրս է Թուրքիայի «Խաղաղության ակունք» ռազմական գործողության շրջանից, կմտնեն ՌԴ ռազմական ոստիկանության և Սիրիայի սահմանապահ ջոկատները: Նրանք պետք է նպաստեին քրդական խմբավորումների դուրսբերմանը թուրք-սիրիական սահմանից 30 կմ հեռավորության վրա, որն ավարտվել է հոկտեմբերի 23-ի ժամը 12:00-ից սկսած 150 ժամ հետո: Նշված ժամկետի ավարտից հետո Սիրիայի հյուսիս-արևելքում իրականացվվում է ռուս-թուրքական համատեղ պարեկություն: