Այսօր, ինչպես ամեն հինգշաբթի՝ Կառավարության նիստի օրը, սևազգեստ մայրերը գործադիրի շենքի առջև էին: Վարչապետ Նիկոլ Փաշինյանից պահանջում են, որ խաղաղ պայմաններում, իրենց խոսքով, սպանված, պաշտոնական վարկածով ինքնասպանություն գործած իրենց որդիների գործերն արդար քննվեն: Նրանք հանդիպում են խնդրել վարչապետ Նիկոլ Փաշինյանից և իր տիկին Աննա Հակոբյանից: 2010թ. զոհված հետախույզ Արթուր Ղազարյանի մայրը՝ Իրինա Ղազարյանը, լրագրողների հետ զրույցում կասկած հայտնեց, որ վարչապետը տիրապետում է իրավիճակին:
«Ուզում ենք հանդիպել Նիկոլ Փաշինյանի կամ Աննա Հակոբյանի հետ, որովհետև իրենց ճիշտը չեն ներկայացնում, ում ինչպես հարմար է՝ կոծկած ներկայացնում են: ԱԺ-ում Ալեն Սիմոնյանը մեզ ասաց, որ ամեն ինչ կանի, որ վարչապետի հետ հանդիպում ունենանք, ինքն էլ մոռացավ: Ի՞նչ է դուրս գալիս, որ լրատվամիջոցների մոտ ժպտում, ասում են՝ կանենք, բայց էջը փակում-անցնում են»,- ասաց Իրինա Ղազարյանը:
Սևազգեստ մայրերը վաղուց են պայքարում իրենց տղաների գործերի բացահայտման համար: 2007թ. զոհված զինծառայող Տիգրան Օհանջանյանի մայրը՝ Գոհար Սարգսյանը, լրագրողների հետ զրույցում պնդեց, որ սպանությունները, որոնք տեղի են ունեցել նախորդ իշխանությունների ժամանակ, հիմա էլ չեն բացահայտվում, քանի որ դրանք շարունակում են քննել այն մարդիկ, որոնք այս գործերը քննել են նաև հանցագործությունների կատարումից անմիջապես հետո:
«Օր առաջ պետք է հեռանային Արթուր Դավթյանը, Հայկ Գրիգորյանը և մնացածը, որոնք եղել են նախկին իշխանության ժամանակ, ոչ ոք չի փոխվել: Իրենք իրենց դեմ չեն կարող քրեական գործ հարուցել: Աղմկահարույց գործերի վերաբացման մոնիտորինգային հանձնաժողովի նախագահն Արտակ Կաշարյանը պետք է լիներ, որը Տիգրան Օհանջանյանի գործով երկրորդ քննիչն է եղել, ես ասացի, որ շահերի բախում է լինելու, գործերն այսքան ժամանակ չեն բացահայտվել, հիմա ինքն իր դեմ գործ չի կարող հարուցել: Ես, արդեն 12 տարի է, Կառավարության շենքի առջև կանգնած եմ, թող մի օր մի օրենքով ձեռք բերված ապացույց բերեն մտցնեն իմ աչքը, ասեն՝ ձենդ կտրի, ապացուցել ենք, որ քո երեխեն էլեկտրահարվել է, գնա նստի տունը: Թող վարչապետը իջնի ասի՝ քո երեխու գործն էս փուլում է, ինչի՞ ես գոռում»:
Հոկտեմբերի 31-ին ԱԺ-ում հանդիպում էր եղել սևազգեստ մայրերի հետ, ինչն ավարտվել էր նրանով, որ սևազգեստ մայրերից մեկը բաժակով ջուրը լցրել էր քննիչի վրա: Դրանից հետո հանդիպման որևէ հրավեր չի եղել: Սևազգեստ մայրերին զայրացրել է նաև ԱԺ «Իմ քայլը» խմբակցության պատգամավոր Հայկ Սարգսյանի բերած օրինագիծը, ըստ որի՝ բանակից ազատվելու համար հարկավոր կլինի վճարել 10 մլն դրամ:
«Այդ 10 մլն-ն ո՞վ կարող է վճարել, միջին խավի մարդիկ կարո՞ղ են: Եթե այս նախագիծն ընդունվի, ապա ինչո՞վ կտարբերվի ներկա իշխանությունը նախկինից: Սրանք օրենքով կվերցնեն, նրանք թաքուն էին անում»,- ասաց Գոհար Սարգսյանը:
Սևազգեստ մայր Իրինա Ղազարյանը, նայելով հրապարակում կանգնած ամանորյա տոնածառին, հիշեց, որ որդին Ամանորը շատ էր սիրում:
«Իմ տղեն մի ամիս շուտ տոնածառ էր դնում, մի ամիս ուշ հավաքում էր, իր ուրախությունն էր: Ես գնացել եմ երեկ, փայլեր եմ առել, որ իր գերեզմանը զարդարեմ»:
4 սևազգեստ մայրերի որդիների մահվան առիթով հարուցված քրեական գործերը դեռ նախաքննության փուլում են: