«Նորօրյա իշխանությունների մոտ սեփական գործունեության համար պատասխանատվությունը դարձել է երկրորդական»,- այս մասին այսօր լրագրողների հետ զրույցում նշեց «Այլընտրանք» ՀԿ համանախագահ Նարեկ Մանթաշյանը։
Մանթաշյանի խոսքով, այն ամենն, ինչ մեկ և կես տարի առաջ խոստացվել է ժողովրդին, ինչով կերակրվել է ժողովուրդը, սուտ էր և կեղծիք։
«Նիկոլ Փաշինյանն իրեն բազմիցս թույլ է տվել դրսևորելու մի մոտեցում, որ ՀՀ-ում ցանկացած գործունեության համար պատասխանատուն ինքն է։ Եվ երկրում ստեղծված իրավիչակը ոչ թե մեր կամքով է, այլ դրա համար նախապայմաններ է ստեղծել հենց իշխանությունը, և պատասխանատվության բեռը բարդել է Նիկոլ Փաշինյանի վրա»,- նշեց Մանթաշյանը։
Իշխանության խոստումը, որ շարքային քաղաքացու կյանքը պետք է բարեկեցիկ դառնա, Մանթաշյանի պնդմամբ, ի չիք է դարձել, և քաղաքացին սկսել է գիտակցել, որ իր կենսամակարդակում որևէ բան չի փոխվում. «Նիկոլ Փաշինյանը պատասխան է տալու իր գործողությունների համար, իր հակասահմանադրական քայլերի համար. պատասխանատու են նաև բոլոր այն պաշտոնյաները, ովքեր ներկայացրել են «հին Հայաստանը», և օգնել են Փաշինյանին և նրա թիմին իշխանմազավթման ճանապարհին»։
Ըստ Մանթաշյանի, չի կարելի տարանջատել հին և նոր Հայաստանները։ Նրա խոսքով, հենց այդ տարանջատումը կեղծիքի հիմքն է։
«Գոնե մեզ հայտնի է, որ Փաշինյանից ավելի հին քաղաքական գործիչ հավանաբար դժվար է գտնել, և նա քաղաքական դաշտում նորելուկ չէ։ Հին Հայաստան ասելով՝ ինչ նկատի ունի մարդը, ով ստեղծվել և քաղաքական կարիերան կերտել է Լևոն Տեր-Պետրոսյանի և Վանո Սիրադեղյանի քավորությամբ։ Մի մարդ, ով 2008 թվականին այդ հին համակարգի կրողների հետ կանգնեց ամբիոնում և փորձեց այդ հինը բերել Հայաստան։ Մարդ, ով կարողացավ տարիներով փախած մնալ պատասխանատվությունից, հետո ինչ-ինչ պայմանավորվածությունների արդյունքում վերադարձավ, կարողացավ 1.5 տարի պատասխանատվություն կրել իր արածների համար, ապա դարձավ իշխանությունների հետաքրքիր գործընկեր»,- նշեց Նարեկ Մանթաշյանը։
Մանթաշյանը կարծում է, որ Նիկոլ Փաշինյանը քաղաքական խեղկատակություն է մտցրել Հայաստան, և նրա թիմը զբաղված է կեղծիքների տարածմամբ. «Եվ հներին ամեն ինչում մեղադրելու լիմիտը սպառելուց հետո էլի մեղադրվում են բոլորը, բացի Նիկոլ Փաշինյանից։ Եվ շեշտադրվում է՝ Նիկոլը լավն է, թիմն է վատը։ Ինչպես կարող է լավ ու գրագետ անձնավորությունը շփվել անգրագետների հետ և ունենալ վատ ընկերներ։ Այդպիսի տրամաբանություն գոյություն չունի։
Այս ամենի հանրագումարում կեղծ օրակարգեր բերել, և այսօր էդ նույն կեղծիքը տարածելով փորձել հասարակութան ուշադրությունը շեղել նաև Արցախյան կարևորագույն խնդրից, կարծում եմ՝ անընդունելի է»։