Տոնել են Ռումինիայի հայերի միության 100-ամյակը

Ռումինիայի նախագահի խորհրդական Սերջիու Նիստորը ներկաներին ընթերցեց նախագահ Կլաուս Յոհաննիսի շնորհավորական ուղերձը, իսկ ՀՀ դեսպան Սերգեյ Մինասյանը` ՀՀ նախագահ Արմեն Սարգսյանի, որտեղ մասնավորապես ասվում էր. «Հայ ժողովրդի ազգային ողբերգության օրերին Ռումինիայի բարեխնամ կառավարությունը ապաստան տվեց Հայոց ցեղասպանությունից մազապուրծ եղած տասնյակ հազարավոր գաղթական հայերին և որբերին: Հենց այդ նպատակով էլ ճիշտ 100 տարի առաջ` 1919 թվականին, ռումինական կառավարության հավանությամբ հիմնվեց Ռումինիայի Հայոց միությունը, որն անմիջականորեն զբաղվեց հայ գաղթականների ընդունման և տեղավորման հարցերով»:

Ռումինիայում ՀՀ դեսպան Սերգեյ Մինասյանը, ողջունելով միության անդամների և հյուրերին, նշեց, որ ՀՀ իշխանությունները մեծ կարևորություն են տալիս հայկական սփյուռքին, որի անբաժան մասն է կազմում Ռումինիայի հայ համայնքը` վերհիշելով բոլորովին վերջերս ՀՀ վարչապետ Նիկոլ Փաշինյանի շնորհավորական ուղերձը Ռումինիայում Հայոց լեզվի, այբուբենի և մշակույթի օր հռչակելուն նվիրված միջոցառման առթիվ:

ՌՀՄ անդամներին իրենց շնորհավորական խոսքը հղեցին նաև վարչապետ Լյուդովիկ Օրբանը, նախկին նախագահ Էմիլ Կոնստանտինեսկուն, ՀՀ ԱԺ պատգամավոր Անուշ Բեղլոյանը, Ռումինահայոց թեմի առաջնորդ Տեր Տաթև եպիսկոպոս Հակոբյանը և այլք:

Ներկաներին փոխանցելով ՀՀ ԱԺ նախագահ Արարատ Միրզոյանի ջերմ շնորհավորնքներն ու ողջույնները կարևոր տարեդարձի կապակցությամբ` ՀՀ ԱԺ պատգամավոր Անուշ Բեղլոյանն ընդգծեց ՌՀՄ ղեկավարների նշանակալի դերակատարությունը միջխորհրդարանական մակարդակով համագործակցության խորացման գործում:

Ելույթների ավարտին Ռումինիայում ՀՀ դեսպան Սերգեյ Մինասյանը Ռումինիայի խորհրդարանի Պատգամավորների պալատի պատգամավոր, Ռումինահայոց միության նախագահ Վարուժան Ոսկանյանին, Ռումինիայի խորհրդարանի Պատգամավորների պալատի պատգամավոր, Ռումինիայի հայոց միության Տուլչայի մասնաճյուղի նախագահ Լուչիան Էդուարդ Սիմիոնին և Ռումինիայի հայոց միության Կլուժ-Նապոկայի մասնաճյուղի նախագահ Կարեն Սեբեշիին հանձնեց ՀՀ նախագահ Արմեն Սարգսյանի հրամանագրով շնորհված «Երախտագիտության» մեդալները, իսկ ՀՀ ԱԺ պատգամավոր Անուշ Բեղլոյանը Ռումինիայի խորհրդարանի Պատգամավորների պալատի պատգամավոր, Ռումինահայոց միության նախագահի տեղակալ Վարուժան Փամբուկչյանին` ՀՀ Ազգային ժողովի «Պատվո» մեդալը: Ռումինահայ ճանաչված գրող, թարգմանիչ, հրապարակագիր, Ռումինիայի և Հայաստանի գրողների միության անդամ Մադլեն Գարագաշյանն իր ստեղծագործական ծանրակշիռ վաստակի և ազդեցիկ գրական և մշակութային գործունեության համար պարգևատրվեց Հայաստանի գրողների միության «Գրական վաստակի համար» մեդալով։