Ստյոպա Սաֆարյանը վստահեցնում է, որ գործող իշխանություններին ու վարչապետ Նիկոլ Փաշինյանին անդադար գովերգելով նպատակ չի ունեցել պաշտոն ստանալ։ Այս մասին նա այսօր՝ դեկտեմբերի 19–ին, Հանրային խորհրդի նախագահ նշանակվելուց, ասաց Ստյոպա Սաֆարյանը՝ պատասխանելով լրագրողի հարցին, թե ինչո՞ւ էր ամիսներ առաջ պնդում, որ ցանկություն չունի դառնալ ՀԽ նախագահ։
«Ուղղակի չեմ մերժել ՀՀ վարչապետի առաջարկությունը։ Ինքն էլ կառավարության նիստում հասկացրեց, որ գոնե ինքն այն մարդկանցից մեկն է, որ հավատում է, որ այդ մարմինը կարող է արդյունավետ աշխատել»,-ասաց Սաֆարյանը։
Դիտարկմանը, թե ասում են՝ ինքը շահագրգռված է եղել, որ Վազգեն Մանուկյանը հեռանա, Սաֆարյանն այսպես արձագանքեց․ «Ես որևէ մեկի հեռացմամբ շահագրգռված չեմ եղել, առաջին օրվանից, եթե վատ եք հետևել ՀԽ գործունեությանը, առաջին իսկ օրվանից իմ ցանկությունն է եղել հստակեցնել, թե մենք ինչով ենք զբաղվում այդ կառույցում։ Որպես քաղաքագետ՝ նշանակված լինելով այդ մարմնում, ականատես եմ եղել այդ մարմինը քաղաքական խաղերում օգտագործելու անթաքույց նկրտումներին։ Եվ գագաթնակետն այն էր, որ վերջին նիստում Վազգեն Մանուկյանն ինքը շարադրեց մի բան, որին ես չէի կարող չընդդիմանալ․ դա Հանրային խորհրդի առաքելության վերասահմանմանն էր վերաբերում և նրան, որ Հանրային խորհրդի առաքելությունն է՝ հասարակությանը դեմ տրամադրել իշխանություններին։ Հետևաբար, հակասությունները ՀԽ նախագահի հետ հասել էին գագաթնակետին այդ հայտնի ելույթից հետո, երբ ակնհայտ էին եղել, որ իմ և նրա պատկերացումները ՀԽ վերաբերյալ տարբեր են»,-ասաց Ստյոպա Սաֆարյանը։